Aqtóbede úzdiksiz jumys isteıtin balalar lageri salynady
AQTÓBE. QazAqparat - Aqtóbe qalasynda jyl boıy jumys isteıtin balalar lageri salynady. Úzdik oqýshylar tynyǵyp, sabaqtaryn lagerde jalǵastyra alady, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev mektep, kolledj oqýshylarymen, muǵalimdermen kezdesti. «Táýelsizdigim - armanym, syıymdy saǵan arnadym» taqyrybyn qamtyǵan kezdesý kezinde ustazdarǵa «Qazaqstan Respýblıkasynyń bilim berý isiniń qurmetti qyzmetkeri» tósbelgisi, Ybyraı Altynsarın tósbelgisi, Bilim jáne ǵylym mınıstrliginiń Qurmet gramotalary men Alǵys hattar berildi.
«Árbir memlekettiń damýy, bolashaǵy bilimdi, mádenıetti, tárbıeli, densaýlyǵy myqty azamattarǵa baılanysty. Sol azamattardy bilimge tárbıeleıtin ustazdar. Aqtóbe balalarynyń halyqaralyq, respýblıkalyq jarystarǵa qatysyp, jeńimpaz bolýyna ustazdar eńbek etti. Sońǵy jyldary 3 myńǵa jýyq aqtóbelik oqýshy halyqaralyq, respýblıkalyq jarystarǵa qatysyp, 1 myńǵa jýyǵy júldeli boldy. Olar Aqtóbeniń, Qazaqstannyń abyroı, bedelin arttyrdy. Memleket basshysy Nursultan Nazarbaevtyń tapsyrmasyna sáıkes bilim salasyna erekshe kóńil bólemiz. Jaqsy bilim berý úshin jaqsy materıaldyq-tehnıkalyq baza kerek. Sońǵy 3 jylda Aqtóbede 21 jańa mektep salyndy. Bıyl 15 mektep iske qosyldy. Qazir 32 mekteptiń qurylysy júrip jatyr»,- dedi oblys ákimi Berdibek Saparbaev.
Óńir basshysy kezdesýge kelgen oqýshylar men ustazdarǵa jaqsy jańalyq jetkizdi. Aqtóbede úzdiksiz jumys isteıtin lager salynady. 300 balaǵa arnalǵan lager halyqaralyq standarttarǵa saı bolady. Lager úzdik oqýshylarǵa, olımpıada jeńimpazdary men júldegerlerine, qoǵamdyq sharalarǵa belsendi qatysyp júrgen oqýshylarǵa arnalady. Alǵyr, úzdik oqýshy bir aı demalyp, lagerde sabaǵyn jalǵastyrady. Bul balalar arasyndaǵy qyzyǵýshylyqty arttyryp, olardyń belsendiligin kúsheıtýge arnalǵan joba. Kezdesý kezinde jyldyń úzdik oqýshylary da marapattaldy. Óz bilimimen, shyǵarmashylyǵymen oq boıy ozyq shyqqan balalar estelik syılyq, alǵys hat aldy.
«London qalasynda ótken úzdik jobalar baıqaýyna qatystym. Aqtóbelik komanda baıqaýda jeńimpaz atandy. Jobamyzda halyqaralyq áýejaı tanystyryldy. Álemniń ár túkpirinen keletin ushaqtar kez kelgen ýaqytta áýejaıǵa qona alady jáne ushaq qondyrýda shekteý bolmaıdy. Biz matematıka, fızıka esepterin qoldanyp, ushaqtardyń qoný ýaqytyn shyǵarǵan bolatynbyz. Bul áýejaı elimizde joq. Eger salynsa, bizdiń jobamyz óte yńǵaıly bolady»,- dedi mektep oqýshysy Nur Qamı.
Úzdikter arasynda sportshylar men jas aqyndar, bıshiler men ánshiler bar.
