Aqtóbede úzdik tergeýshiler anyqtaldy
AQTÓBE. QazAqparat – Aqtóbe oblystyq polıtsııa departamenti úzdik tergeýshi men anyqtaýshyny atady, dep habarlaıdy QazAqparat tilshisi.
Aqtóbe oblysynyń polıtsııa departamenti tergeýshiler men anyqtaýshylardyń eń úzdikterin iriktep aldy. Óńirdiń úzdik tergeýshisi bolyp Aqtóbe qalasy Astana aýdany № 1 qalalyq polıtsııa bóliminiń tergeýshisi Janar Ismaǵulova tanyldy.
«Osy mamandyqty tańdaǵanyma esh ókinbeımin. Armanym – qylmys sanyn azaıtý, quqyq qorǵaý salasynda abyroıly eńbek etý. Keıde qylmys ornyna shyǵyp, kúdiktilermen kezdeskende qorqynysh bolady. Biraq mamandyq tańdaǵanda batyl bolýdy úırendim», - dedi Janar Ismaǵulova. Ol 2019 jyly 100-den astam qylmysty tergep, isti sotqa jiberdi. Onyń 17-i aýyr sanattaǵy qylmys.
Al Aqtóbe oblysynyń eń úzdik anyqtaýshysy - Aqtóbe qalasy Almaty aýdany № 3 qalalyq polıtsııa bóliminiń aǵa anyqtaýshysy Aıbolat Baımýrzın. Ol Qarjy polıtsııasy akademııasy men ІІM Almaty akademııasynyń túlegi. Barlyǵy 400-ge jýyq qylmystyq isti qarap, kidirtpeı sotqa joldaǵan.
«Tergeýshiniń de júregi men jany bar. Biz aqylǵa, bilim men biliktilikke júginemiz, biraq qaı iste bolmasyn bastysy adamgershilik. Adamdarǵa zeıin bólip, erekshe yqylaspen tyńdaýǵa tyrysamyn», - dedi Aıbolat Baımýrzın.
