Aqtóbede úzdik muǵalim 2 mıllıon teńge syıaqy aldy
AQTÓBE. QazAqparat - Aqtóbede ustazdarǵa 50-100 myń teńge kóleminde syılyq berildi. Al respýblıkalyq baıqaý jeńimpazdary 2 mıllıon teńge aldy, dep habarlaıdy QazAqparat tilshisi.
Búgin Aqtóbe oblysynyń ustazdary tól merekesin atap ótti. Óner ortalyǵyna bilim berý isiniń ardageri, mektep muǵalimderi jınaldy. Ustazdardy tól merekesimen oblys ákimi Berdibek Saparbaev quttyqtady.
«Dúnıede eń qadirli, qasıetti mamandyqtardyń biri -muǵalim. Olar bolashaqty, prezıdent, ǵalym, ákim, mınıstrdi tárbıeleıdi. Adamnyń adam bolýy ustazdyń tárbıesine, bergen bilimine baılanysty. Jyl saıyn bıýdjettiń 40 paıyzy bilim salasyna bólinip keledi. Tek bıyl 26 mektep qurylysy júrdi. Sonyń 15-i bıyl paıdalanýǵa berildi. Jyl boıy jumys isteıtin balalar lageri paıdalanýǵa berilip, aýdan, aýylda jaqsy oqıtyn balalar demalyp, bilim alady. Sol lagerde jumys isteıtin muǵalimderdiń jalaqysy 15-20 paıyz kóp bolady. Ári múmkindigi shekteýli balalardyń demalyp, saýyqtyrý úshin «Kúnshýaq» balalar lageri ashyldy. Bir aptadan keıin Aqtóbe qalasynda taǵy saýyqtyrý ortalyǵy paıdalanýǵa beriledi. Aqtóbe balalary halyqaralyq, respýblıkalyq olımpıadanyń jeńimpazy bolyp júr. Bul ustazdardyń eńbegi»,- dedi oblys ákimi Berdibek Saparbaev.
Ustazdar kúni «Úzdik pedagog-2018» baıqaýynyń respýblıkalyq kezeńi kezinde jeńimpaz atanǵan Orynbasar Sarjanov, Gúlnaz Myńjasarova, Gúlsim Qarajanova, Botagóz Qydyrbaeva, Almagúl Mýkasheva atalyp ótti. Olar respýblıkalyq baıqaý kezinde 2 mıllıon teńge syıaqyǵa ıe boldy.
Aıta keteıik, mereke kúni QR Bilim jáne ǵylym mınıstrliginiń departament dırektory Sholpan Karınova kelip, ustazdardy quttyqtady. Keıin Ybyraı Altynsarın atyndaǵy tósbelgi, QR Bilim berý isiniń qurmetti qyzmetkeri tósbelgisi men QR Bilim jáne ǵylym mınıstrliginiń «Qurmet gramotasyn» tabys etti. Al 28 muǵalimge alǵys hat berildi. «Úzdik pedagog-2018» baıqaýynyń oblystyq kezeńinde jeńimpaz atanǵan ustazdarǵa alǵys hat pen 100 myń teńge syılyq berildi. Taǵy 22 muǵalim 50 myń teńge aldy.
