Aqtóbede úıirli jáne saıaq shegirtkege qarsy ýlaý jumysy júgiziledi
AQTÓBE. KAZINFORM — Jospar boıynsha 424 myń gektar aýmaqta úıirli, al 160 myń gektar aýmaqta saıaq shegirtkege qarsy óńdeý jumysy ótedi. Oǵan ushý apparattary da qoldanylady.
Agroónerkásip keshenindegi memlekettik ınspektsııa komıteti aýmaqtyq ınspektsııasynyń basshysy Dastan Saǵyrovtyń málimetine súıensek, bıyl 424 055 gektar jer úıirli shegirtkege qarsy óńdeýden ótedi. Ótken jylmen salystyrǵanda aýdany 88,9 myń gektarǵa az. Óńdeý jumystary kezinde drondar da qoldanylady. Barlyǵy 74 búrikkish tehnıka jumyldyrylady.
Aqtóbe oblysy ákimdiginiń baspasóz qyzmetiniń habarlaýynsha, jergilikti bıýdjet esebinen saıaq shegirtkege qarsy 159,6 myń gektar alqapta óńdeý josparlanǵan.
Memlekettik satyp alý portalyndaǵy aqparatqa súıensek, Aqtóbe oblystyq aýyl sharýashylyǵy basqarmasy «aýyl sharýashylyǵy daqyldaryn ýly hımıkattarmen óńdeý boıynsha qyzmetter» lotynda mamyr, maýsym, shilde, tamyz aılarynyń jumysyn bekitken. Bul jumystarǵa 465 mln teńgeden astam qarjy bólindi. Kelisimshartta óńdeý kólemi kemýi nemese artýy múmkin ekeni jazylǵan. Óńdeý tańǵy jáne keshki ýaqytta júrgiziledi.
— Saıaq shegirtkege qarsy hımııalyq óńdeý qyzmetterin kórsetý úshin aerozoldyq generatorlardyń sany Fıtosanıtarııalyq is-sharalardy júrgizý qaǵıdalaryna saı bolýy tıis. ıAǵnı keminde 10 tehnıka paıdalanylady. Tapsyrys berýshi monıtorıng jasaýy úshin ár tehnıkada GPS-treker ornatylýy kerek. Pestıtsıdter Aqtóbe oblysynyń aýmaǵyndaǵy arnaıy qoımalarda saqtalýy tıis, — dep jazylǵan tehnıkalyq qujatta. Bul jumystar jeńimpaz atanǵan «Aqtóbe-Qunarlylyq» JShS-niń mindeti.
Eske salsaq, 2026 jyly elimizde shegirtkege qarsy hımııalyq óńdeý kólemi 2,2 mln gektar bolady.
Ári shegirtkege qarsy kúres tsıfrlandyrylmaq.
