Aqtóbede uıyqtap jatqan balanyń betin tyrnaǵan balabaqsha kútýshisi jumystan shettetildi
AQTÓBE. KAZINFORM – Oqıǵa Shalqar aýdany Aıshýaq aýylyndaǵy «Aıgólek» balabaqshasynda boldy. Bala kútýshisiniń is-áreketi balabaqshadaǵy beınebaqylaý kamerasyna túsip qalǵan.
Aıshýaq aýylynyń turǵyny Alınur Shonanovanyń aıtýynsha, oqıǵa 29-qyrkúıek kúni bolǵan. Anasy 2 jasqa tolmaǵan balasynyń betindegi jarany kórip, birden balabaqsha ishindegi beınebaqylaý kamerasynyń jazbasyn qaraýǵa barǵan. Vıdeodan balabaqsha tárbıeshisi kómekshisiniń uıyqtap jatqan bala janyna barǵanyn kórýge bolady.
— Balabaqshanyń burynǵy meńgerýshisi men qyzmetkeri arasynda sot protsesi bolyp jatyr. Tárbıeshiniń kómekshisi sol meńgerýshiniń týǵan sińlisi. Ol tárbıeshiniń aıaǵynan shalý maqsatynda osylaı jasaǵan dep oılaımyn. Eki ortada meniń balam zardap shekti. Betinde tyrnaq izderi qalyp qoıdy. Bul adamdar qoǵamǵa óte qaýipti. Sol úshin zań organdary tıisti sharasyn qabyldaýy kerek. Áleýmettik jelige salǵym kelmegen. Oılana kele salý kerek dep sheshtim. Jaı jumystan shyǵarmaı, zań aıasynda shyǵarýdy talap etemin. Keshirim bermeımin, — dep jazdy Alınur Shonanova.
Aqtóbe oblystyq bilim basqarmasy baspasóz qyzmetiniń habarlaýynsha, balabaqsha qyzmetkeri jumystan ýaqytsha shettetildi.
— Qazirgi ýaqytta quqyq qorǵaý organdary tergeý jumystaryn júrgizip jatyr. Oqıǵaǵa qatysy bar qyzmetker jumystan ýaqytsha shettetildi. Atalǵan jaǵdaı bilim basqarmasynyń baqylaýynda, — dep habarlady basqarmasynyń baspasóz qyzmeti.
Osy oqıǵadan soń polıtsııa Qylmystyq kodekstiń 140-baby boıynsha is qozǵady.
— Kámeletke tolmaǵan balany tárbıeleý boıynsha mindetterdi oryndamaý nemese tıisinshe oryndamaý faktisi boıynsha qylmystyq is qozǵaldy. Sotqa deıingi tergep-tekserý aıasynda qajetti tergeý áreketteri júrgizilip jatyr. Oqıǵanyń barlyq mán-jaıy men sebebin anyqtaý úshin beınebaqylaý kameralaryndaǵy jazbalar alyndy, — dep habarlady Aqtóbe oblystyq PD baspasóz qyzmeti.
Eger kúdiktiniń kinási dáleldense, belgili bir laýazymdy atqarý nemese qyzmetpen aınalysý quqyǵynan úsh jylǵa deıingi merzimge aıyrylady. Sonymen birge zańda 1 000 AEK deıingi mólsherde aıyppul salý, 600 saǵatqa deıingi merzimge qoǵamdyq jumystarǵa tartý, 2 jylǵa deıingi merzimge bas bostandyǵyn shekteý, ne sol merzimge bas bostandyǵynan aıyrý jazasy qarastyrylǵan.
Buǵan deıin Atyraýda jekemenshik balabaqsha tárbıeshisiniń búldirshinge kúsh qoldanǵany vıdeoǵa túsip qaldy.
