Aqtóbede úıi sýǵa ketken 66 turǵynǵa jer telimi berildi
AQTÓBE. QazAqparat - Aqtóbedegi sý tasqyny kezinde 81 úı qırap qaldy. Qulaǵan 66 úıdiń ıesine jer telimi berilip, qurylys materıaldaryna 1 mıllıon teńgeden aýdaryldy, dep habarlaıdy QazAqparat tilshisi.
Aqtóbe qalasyndaǵy sý tasqyny kezinde 81 úı qıraǵan. Úıi qulaǵan 5 adam búgin «Nur-Aqtóbe» yqsham aýdanynan páter aldy. Taǵy 8 adam ýaqytsha baspanaly boldy. Al 66 adam qala irgesindegi Qýraıly, Sazdy, Órleý, Qyzyljar aýyldarynan jer alyp, úı salýǵa arnalǵan 1 mıllıon teńgeniń sertıfıtkatyna ıe boldy.
«Kezdesken kezde barlyǵynyń máselesin zańǵa sáıkes sheshemiz dep aıtqan bolatynbyz. Jer kepti, aýa raıy ózgerdi. Ýádeni iske asyratyn kez keldi. Arnaıy komıssııa alǵashqy qorytyndy jasady. Nátıjesinde 200-ge jýyq otbasynyń úıin jóndeýge, jıhazdaryn alýǵa 22 mıllıon teńge aqsha bólindi. Endigi kezek - jer berý. Qýraıly aýylynan 44 otbasyǵa jer berildi. Osy jerge jaryq, jylý, sý, gaz, joldy memleket esebinen alyp kelemiz. Kómektesý úshin árqaısysyna 1 mıllıon teńgeden bólinedi. Oǵan qurylys materıaldary alynady. Bárimiz qazaqpyz. Qazaq aqsha bolsa, toı jasaǵysy keledi. Sizderge keregi úı. Sondyqtan qurylys kompanııalary materıaldy ákelip beredi. Úıdi ózderińiz salasyzdar. Eger múmkindigińiz kelmese, úı salý, qurylys júrgizýge kómektesedi», - dedi Berdibek Saparbaev.
Qalalyq ákimdik tańdaǵan tórt aýylda jaryq, sý, gaz bar. Mektebi men balabashasy jumys istep tur.
«Mahambet aýylyndaǵy úıimiz qırap qaldy. Sol kúni mektepke barmaı, páter jaldap kettik. Áli kúnge deıin 40 myń teńgege deıin páter jaldap júrmiz. Otbasymyzda 7 adam bar. Jalǵyzbasty anamyn. Eki aǵam, anam bar, úsh balammen bir jerde turamyz. Jer berdi. Endi úı salamyz», - dedi Djýletta Jumashqalıeva.
Aıta keteıik, qurylysqa berilgen 1 mıllıon teńgeniń 800 myń teńgesine qurylys materıaly alynady. Al 200 myń teńgesi qurylysshy qyzmetine jumsalady. Qujattardy qalalyq ákimdik aqysyz rásimdep beredi.
