Aqtóbede úı órtenip, bir adam qaza tapty
AQTÓBE. KAZINFORM — Oqıǵa Qobda aýdany ortalyǵyndaǵy Şerbakov kóshesinde boldy. Ázirge órttiń neden tutanǵany belgisiz.
Aqtóbe oblystyq TJD baspasóz qyzmetiniń habarlaýynsha, órt keshe boldy. Qobda aýylyndaǵy Şerbakov kóshesinde ornalasqan turǵyn úıdiń bólmesi men shatyry órtendi. Órttiń aýdany — 96 sharshy metr. Órt kezinde 1995 jyly týǵan áıeldiń denesi tabyldy.
— Órt tolyqtaı sóndirildi. Oqıǵa ornyna Aqtóbe oblysynyń TJD qyzmetkerleri, sondaı-aq jedel medıtsınalyq járdem brıgadasy jáne polıtsııa jumyldyryldy. Órttiń shyǵý sebepteri men mán-jaıy anyqtalyp jatyr, — dedi Aqtóbe oblystyq TJD baspasóz qyzmeti.
Ótken aptada Astanada salynyp jatqan 12 qabatty úıden órt shyqty. Birinshi qabattan jetinshi qabatqa deıin jylý oqshaýlaǵysh materıaldyń ashyq janyp jatqany baıqaldy.
