Aqtóbede ústinen 45 qyzmetker shaǵymdanǵan bas dáriger qatań sógis aldy
AQTÓBE. QazAqparat - Aqtóbe oblysy Shalqar aýdandyq aýrýhanasynyń bas dárigeri Asqar Esmaǵambetovke qatań sógis jarııalandy. Onyń ústinen 45 adam aryz jazǵan bolatyn, dep habarlaıdy QazAqparat tilshisi.
Aqtóbe oblysy, Shalqar aýdandyq aýrýhanasynyń bas dárigeri Asqar Esmaǵambetovtiń jumysyna syn aıtqan 45 adamnyń aryzy qaraldy. Tekserýden soń bas dárigerge qatań sógis jarııalandy.
«Aryz túsip, arnaıy komıssııa quryldy. Shaǵymda kórsetilgendeı, qarjyny maqsatsyz jumsaý deregi anyqtalmady. Biraq birqatar kemshilik bar. Sondyqtan bas dárigerge qatań sógis jarııalandy. Eger taǵy bir zańsyzdyq anyqtalsa, ornyn bosatady», - dedi Aqtóbe oblystyq densaýlyq saqtaý basqarmasynyń basshysy Áset Qalıev.
Aıta keteıik, QR Memlekettik qyzmet isteri jáne sybaılas jemqorlyqqa qarsy is-qımyl agenttigi oblystyq departamentiniń «Adaldyq alańynda» ótken jıynnan tikeleı efır áleýmettik jelide kórsetildi.
