Aqtóbede úshem ómirge keldi

AQTÓBE. KAZINFORM – Aqtóbe qalasynda úshem ómirge keldi. Olarǵa ata-anasy Ahmad, Ibrahım jáne Ábdikárim esimderin berdi.

Aqtóbe qalasyndaǵy perınataldyq ortalyqta búgin úshemder úıine shyǵaryldy. Ahmetovter otbasyndaǵy qýanyshty bólisýge týǵan-týystary men oblystyq densaýlyq saqtaý basqarmasynyń ókilderi bardy. Perınataldyq ortalyqtyń aqparatyna súıensek, úshemderdiń anasy 32 jasta. Buǵan deıin 4 qursaq kótergen. Úsh qyz, bir uldy tárbıelep otyrǵan otbasy Aqtóbe qalasynyń Eset batyr turǵyn alabynda turady. 

- Bosaný bóliminiń meńgerýshisi Abat Kýbıev, akýsher-gınekolog Nurlybek Karmanov, medbıkeler Baqyt Baımaǵanbetova, Zarına Bıjdaeva, neonatolog Aıdana Nurmuhanova, Albına Shegenbaeva otaǵa qatysty. Ahmadtyń salmaǵy 2655, Ibrahım 2255, al Ábdikárim 2355 gr boldy. Bala men ananyń densaýlyǵy jaqsy,- dep habarlady oblystyq perınataldyq ortalyqtyń baspasóz qyzmeti.

Qazir úshemniń anasy ózin jaqsy sezinedi. Ol dárigerlerge alǵysyn bildirdi.

- Kesir tiligi otasy jasaldy. Dárigerlerge alǵysymdy bildirgim keledi. Árqaısysy kómektesti. Bári de óz isiniń mamandary, zor qoldaý kórsetti. Ózim tabıǵı jolmen júkti bolyp, estiginde qobaljydym. Úshem bolady dep oılamadyq. Bul uly syı. Sheksiz alǵys aıtamyn. Úsh ulymdy qolyma alyp, qýandym,- dedi jas ana Aısana Ahmetova. Qazirgi kezde otbasynyń úlken balasy 10 jasta, kishisi 3-te.

Aqtóbe oblystyq densaýlyq saqtaý basqarmasy basshysynyń orynbasary Ashat Balyqovtyń aıtýynsha, 9 aıda óńirde 16 800 bala ómirge keldi. Onyń 120-y egiz, úsheýi úshem.

Eske salsaq, bıyl tamyzda ómirge kelgen úshemniń ata-anasy balalarǵa Hamza, Ibrahım jáne Ahmad esimderin berdi.