Aqtóbede úsh jyl buryn berilgen turǵyn úıdiń tóbesinen sý aǵyp tur

2014 jyly «Qoljetimdi baspana» memlekettik baǵdarlamasymen páterdi nesıege alǵan aqtóbelikter eki jyldan beri kúz ben kóktemniń jańbyrynan zardap shegip otyr. Jańbyr jaýǵan saıyn «ıÝnıs sıtı» turǵyn úı  keshenindegi 7-8 qabatty úılerdiń tóbesinen sý ketedi. Qazirgi kúni lıft istemeıdi, podezde jaryq joq. Kommýnaldyq máselelerdiń qıyndyǵyn aıtqan turǵyndar birneshe máseleniń sheshimin kútip otyr.

«Kópqabatty úıde lıft istep turdy, jaryq ta boldy. Alǵashqy jyly jańa baspanany alǵanymyzǵa qýanyp, rıza bolǵan edik. Biraq eki jylda qýanyshymyz qaıǵyǵa aınaldy. Men kúnine 5-6 ret joǵary kóterilip, tómen túsemin. Qolymda kishkentaı balam bar, oqýshylardy mektepten kútip alamyn. Sebebi, podezd qarańǵy, balalarym qorqady», - dedi turǵyn Aqtoty Jolmaǵambetova.

Qazirgi kúni memlekettik baǵdarlamamen páter satyp alǵandar nesıege aı saıyn 45-95 myń teńge tólep otyr. Olar nesıeni 20 jyl boıy óteıdi. Páter ıeleri kooperatıvine jaryq, lıfttiń aqshasyn tólep, kelisim shartqa otyrdy. Al PIK esepshotyna túsken qarjy kommýnaldyq mekemelerge berilýi tıis bolatyn. Biraq eki arada PIK bul qarjyny tólemegen, ózinde saqtaǵan. Qazirgi qaryz 5 mıllıon teńgege jetti.

«Kommýnaldyq mekemelerdiń aqshasyn arnaıy kompanııaǵa berip otyrǵan edik. Olar aı saıyn aqsha jınaıdy. Bizde túbirtek bar, kommýnaldyq tólemderimiz ótelgen. Biraq sońynda taǵy turǵyndar bereshek bolyp otyr»,- dedi Arman Ahmetov.

«Aqtóbe qalasy ákiminiń orynbasary «Samuryq Qazyna» AQ ókilimen, PIK tóraǵasy, turǵyndarmen kezdesý ótkizdi. Bul úılerge jylý berildi. Negizinen turǵyndar ortaq kommýnaldyq jelilerdi paıdalanyp, keıbiri tólemderdi ótemegen. Turǵyndar jaryqqa, jylý taratý qazandyǵyna arnalǵan gazǵa, lıft qyzmetine bereshek bolyp otyr. Qaryzdyń bárin turǵyndar óteýi tıis. Bereshek 5 mıllıon teńgege jetken eken. Naqty kimderdiń qaryz ekeni anyqtalady. Jaryq taratýshy mekeme esepteý quraldaryn tekserýge kiristi,- dedi Aqtóbe qalalyq turǵyn úı ınspektsııasy bóliminiń basshysy Haıdar Ermashev.