Aqtóbede úsh kólik soqtyǵysyp, júrgizýshi men jolaýshy kóz jumdy
AQTÓBE. KAZINFORM - Jol-kólik apaty Aqtóbe qalasyndaǵy kópir mańynda boldy. Oqıǵa ornyna birneshe jedel járdem brıgadasy men polıtsııa jetti.
Oqıǵa 5-qarasha saǵat 22:00 shamasynda boldy. Aldyn ala jasalǵan boljam boıynsha «Lexus» avtokóliginiń júrgizýshisi «Subaru» kóligine baryp soǵady. Sol kezde «Subaru» avtokóligi óz baǵytyn ózgertip, «Chevrolet Cobalt» jeńil kóligine soqtyǵysty.
- Jol-kólik apaty kezinde «Subaru» avtokóliginiń júrgizýshisi men jolaýshy oqıǵa ornynda kóz jumdy. Taǵy úsh adam aýrýhanaǵa jetkizildi. Oqıǵanyń mán-jaıy anyqtalyp jatyr,- dep habarlady Aqtóbe oblystyq PD baspasóz qyzmeti.
Eske salsaq, Aqmola oblysyndaǵy tas jolda iri jol-kólik oqıǵasy boldy. Oqıǵa ornyna kelgen quqyq qorǵaý organdarynyń qyzmetkerleri Astanaǵa qaraı kele jatqan DAF júk kóliginiń júrgizýshisi taıǵaq jolda kólikti basqara almaı, qıǵash tosqaýylǵa soǵylǵanyn anyqtady.