Aqtóbede úsh kólik soqtysyǵyp, bir adam aýrýhanaǵa tústi
AQTÓBE. QazAqparat - Aqtóbede úsh avtokólik soqtyǵysyp, saldarynan 1 adam aýrýhanaǵa tústi, dep habarlaıdy QazAqparat tilshisi.
Aqtóbede «Toyota Land Cruiser Prado 120» markaly avtokóliginiń 41 jastaǵy júrgizýshisi Aqtóbe-Astrahan avtojolynyń 41-shaqyrymynda «Toyota Land Cruiser Prado 150» markaly avtokólikpen soqtyǵysty. Birinshi kóliktiń rýlinde áıel bolǵan. Ol Aqtóbeden Alǵa qalasy baǵytynda kele jatyp, jol-meteorologııalyq jaǵdaıdy eskermegen.
«Keıin «Toyota Land Cruiser Prado 150» avtokóligi qozǵalys baǵytyn ózgertip, «Geely» kóligin soqqan. Jol-kólik oqıǵasy saldarynan «Geely» avtokóliginiń 35 jastaǵy jolaýshysy Aqtóbe qalasynyń jedel járdem aýrýhanasyna jetkizildi», - dedi oblystyq Polıtsııa departamenti baspasóz qyzmetiniń jetekshisi Erbolat Sarqulov.
Sondaı-aq óńirde bir apta ishinde 22 mas júrgizýshi anyqtaldy. Oblystyq PD JPQB aǵa ınspektory Asylhan Bekbosynovtyń aıtýynsha, jeti kúnde jolda 4 myńǵa jýyq buzýshylyq anyqtaldy. Jyldamdyqty saqtamaǵan 385 júrgizýshi ákimshilik jaýapqa tartyldy. Jaıaý júrginshilerge jol bermegeni úshin 185 júrgizýshi ákimshilik tártippen jazalandy.
