Aqtóbede úsh aıdan keıin balabaqsha tárbıeshileriniń qolyna jalaqylary tıdi
AQTÓBE. QazAqparat - Aqtóbe qalalyq bilim bólimi bıýdjetti durys josparlamaı, balabaqsha tárbıeshileri úsh aı jalaqy ala almady. Bıýdjet balabaqshalar aldyndaǵy 61 mıllıon teńge qaryzyn birer kún buryn ǵana ótedi, dep habarlaıdy QazAqparat tilshisi.
Aqtóbedegi balabaqsha qyzmetkerleri úsh aı boıy jalaqy kútip, sharshaǵan soń qalalyq bilim bóliminen jaýabyn surady. Mektepke deıingi uıymdarǵa jaýapty mekeme óz qateligin moıyndap, qaryzdy der kezinde qaıtarǵanyn habarlap otyr. «Aqtóbe aqparat» ortalyǵynda ótken baspasóz máslıhaty kezinde Aqtóbe qalalyq bilim bólimi basshysynyń mindetin atqarýshy Rýstam Áljanov qaryz túgel ótelip, jaýapty qyzmetker jumysynan bosatylǵanyn jetkizdi.
«Aqtóbe qalasy boıynsha 87 jekemenshik balabaqshada memlekettik tapsyrys oryndalady. Ótken jyly 19 mektepke deıingi uıymǵa 61,9 mıllıon teńge qaryz tirkeldi. Eseptegende 2017 jyldyń qarasha aıynda 8, al jeltoqsan aıynda 19 balabaqsha aldynda bereshegimiz boldy. Qazirgi ýaqytta bereshek túgel ótelip, tárbıeshiler óz jalaqysyn aldy», - dedi Aqtóbe qalalyq bilim bólimi basshysynyń mindetin atqarýshy Rýstam Áljanov.
Aqtóbe qalalyq bilim bólimi balabaqsha aldyndaǵy qaryzyn rastaǵanymen, jekemenshik balabaqsha óz qyzmetkerine ýaqtyly jalaqy tóleý mindetin oryndamaǵanyn jetkizdi. Ákimdik ókili balashaqsha tárbıeshisi jalaqy almasa, oǵan aldymen kásipker kináli dep otyr.
«Ótken jyly bıýdjetti josparlaý sapasyz júrgizilgen. Sondyqtan mektepke deıingi bilim berýdi jáne oqytýdy qarjylandyrýǵa jaýapty bas maman Marat Esenamanov qyzmetinen bosatyldy»,- dedi Rýstam Áljanov.
Aıta keteıik, qalalyq bilim bólimi balabaqshalar aldyndaǵy bereshegin 2018 jyldyń bıýdjeti esebinen ótedi. Aqtóbe qalasynyń ákimi Іlııas Ispanovtyń aıtýynsha, aldaǵy ýaqytta memlekettik balabaqshalar qurylysy júrmeıdi. Bári memlekettik-jekeshelik aıasynda salynyp, memlekettik balabaqshalar senimgerlik basqarýǵa berilip jatyr.
