Aqtóbede úsh aýysymdy mektep máselesi qalaı sheshilýde
AQTÓBE. QazAqparat - Aqtóbe qalasynda eski mektepterdiń janyna jańa ǵımarat salynyp jatyr. Qalalyq bilim bólimi osy arqyly úsh aýysymdy mektep máselesin sheshpek, dep habarlaıdy QazAqparat tilshisi.
Aqtóbe qalasyndaǵy jańa aýdandarda, halyq kóp shoǵyrlanǵan jerlerde áli de úsh aýysymdy mektep máselesi sheshilmeı tur. Óńirde barlyǵy 27 mekteptiń qurylysy júrgizilse, 9 bilim ordasy qyrkúıekte paıdalanýǵa beriledi. Qurylys qarqyny artqanymen, oblys ortalyǵynda úsh aýysymdy mektep máselesi sheshilmeı tur.
«Ótken jyly qalamyzda 13 mektep úsh aýysymda bilim bedi. Jyl saıyn oqýshylar kontıngenti 5 myń balaǵa artyp otyr. 2018-2019 oqý jylynda 74 myńnan astam oqýshy mektepterde bilim alady. Bıyl barlyǵy 9 myńnan astam bala 1 synypqa barady. Negizi úsh aýysymdy mektepterdiń máselesin joıý úshin jańa qurylys júrgizý qajet. Qalada 7 mektep qurylysy aıaqtalyp, qoldanysqa berildi. Degenmen №13, 64, 60 mektepterde áli de úsh aýysym saqtalyp qaldy. Bul máseleni sheshý úshin 9, 21, 27, 29 mektepterge qosymsha ǵımarat salynyp jatyr»,- dedi Aqtóbe qalalyq bilim bóliminiń basshysy Aısáýle Jaqsybaeva.
Jıyn kezinde oqýlyqpen qamtamasyz etý máselesi aıtyldy. Jańa oqý jylynda oqýlyq satyp alýǵa 789 mıllıon teńge bólindi. Barlyǵy 11 baspamen kelisimshart jasaldy. Qazirgi tańda oqýlyqtar jetkizilip, mektepterge taratylýda.
