Aqtóbede úsh aýysymdy mektep janyndaǵy jańa ǵımarat qurylysy 4 jylǵa sozyldy
AQTÓBE. KAZINFORM — D. Qonaev atyndaǵy mektep-gımnazııasy janynan 600 oryndyq qosalqy ǵımarat salynyp jatyr. 2023 jyly bastalǵan qurylys jańa oqý jylyna deıin aıaqtalmaýy múmkin.
Aqtóbe qalasy Eset batyr turǵyn alabyndaǵy mektep-gımnazııa úsh aýysymdy bilim ordasy. Munda 3300-den astam bala bilim alady. Mektep 1 200 orynǵa shaqtalǵan, eki aýysymda 2,5 myń bala oqı alady. Ata-analary áleýmettik jeli arqyly osy máseleni kóterip, Oqý-aǵartý mınıstrligine, memlekettik organ ókilderine shaǵym túsirdi. Onda on jyldan astam ýaqyttan beri úsh aýysymdy mektep máselesi sheshilmegenin, balalardyń qosymsha úıirmege qatysý quqyǵynan aıyrylǵanyn jáne úshinshi aýysymnyń saǵat 15:45–20:30 aralyǵynda ótetinin habarlady. Balalar sabaqtan kesh shyǵady, qysta qaýip joǵary.
Shynynda da mektep janyndaǵy qosymsha ǵımarat qurylysy 2023 jyly bastalyp, kúni búginge deıin jalǵasyp jatyr. Merdiger kompanııa qurylysty jańa oqý jylyna deıin aıaqtaýǵa ázir. Ol úshin tapsyrys berýshi Aqtóbe oblystyq qurylys, sáýlet jáne qala qurylysy basqarmasy 350 mln teńgeden astam qarjy aýdarýy tıis. Osy aıda tek 50 mln teńgeden astam qarjy qarastyryldy.
— Qurylys jumystaryna qarjyny bólip-bólip aýdarady. Jumys atqarylady, qarjy bólinedi. Bıyl eki aı aqsha bolmaı, eshteńe istemeı otyrdyq. Búgin qurylys qaıta jandanyp jatyr. Eger aqshany ýaqytyly aýdarsa, jańa oqý jylyna deıin aıaqtap berer edik. Áli 350 mln teńge kerek, al bizge 50 mln teńgeden astamyn bóldi. Oǵan santehnıkany ornatý jumystary júrgiziledi. Erteń qajetti qurylys materıaldary alynyp, santehnık mamandar iske kiristi, — dedi qurylys jumymtarynyń basshysy Nurlybek Qarataev.
Qosalqy ǵımaratta ashana, shaǵyn jáne úlken sport zaly, kitaphana men oqý kabınetteri bar. Mektep ishi áktelgen, edenge lınoleým tóselip jatyr.
Aqtóbe oblystyq bilim basqarmasy baspasóz qyzmetiniń habarlaýynsha, qosalqy ǵımarattyń joba quny 2,6 mlrd teńge. Qazirgi kezde onyń 2,2 mlrd teńgeden astamy ıgerildi, qurylystyń 80% aıaqtaldy.
— Buǵan deıin merdiger kompanııanyń esepshoty buǵattalyp, qurylys ýaqytsha toqtatyldy. Búginde esepshot qaıta ashylyp, qurylys jalǵasyp jatyr. Kireberistiń, sport zaldyń terezesin salý, aınalany abattandyrý, jaryqtandyrý, káriz júıesin montajdaý, qural-jabdyqtardy ornatý jumysy júrip jatyr. Bıyl jyl sońyna deıin qoldanysqa beriledi, — dep habarlady Aqtóbe oblystyq bilim basqarmasy baspasóz qyzmeti.
Eske salsaq, Almaty mektepterinde 30 myń oqýshy orny jetispeıdi.
