Aqtóbede úsh aýysymda oqyǵan mektepterdegi jaǵdaı qalaı ózgerdi
AQTÓBE. KAZINFORM — Aqtóbe qalasy Altyn orda shaǵyn aýdanynda 2 000 jáne 900 oryndyq eki mektep qatar salyndy. Bul mektepter úsh aýysym máselesin sheshýge septigin tıgizdi.
Aqtóbe oblysynda bıyl 11 jańa mektep paıdalanýǵa berildi. Bul 2 apatty, 3 eski jáne 6 oryn tapshylyǵy máselesin sheshýge septigin tıgizgen iri qurylys jumystary. Sonyń ishinde «Keleshek mektepteri» ulttyq jobasy aıasyndaǵy 11 400 orynǵa arnalǵan 14 mekteptiń qurylysy tolyq aıaqtaldy. Jyl sońyna deıin taǵy 3 mektep qoldanysqa beriledi. Bilim ordalary jergilikti bıýdjet esebinen boı kóterip jatyr.
Búginge deıin Aqtóbe qalasynda úsh aýysymdy mektep máselesi ózekti boldy. Ásirese Altyn orda shaǵyn aýdanyndaǵy mektepter úsh aýysymda jumys istep, balalardyń basym bóligi jeke bilim berý uıymdarynda oqydy. 2025-2026 oqý jyldarynda № 80 jalpy bilim beretin orta mektep ashylyp, qoldanysqa berildi. Bul 2 000 balaǵa shaqtalǵan bilim ordasy.
— Bul Altyn orda shaǵyn aýdany turǵyndarynyń kópten kútken qurylysy edi. Byltyr 1 800 oqýshy qabyldandy. Sonymen birge 9 daıarlyq toby ashyldy. Olarǵa 200-den astam bala boldy. «Keleshek mektepter» ulttyq jobasy aıasynda salynǵan mektepte oqýshyǵa, ustazǵa barlyq jaǵdaı jasalǵan. Bastaýysh synyptary tolyq jabdyqtalǵan, tipti ǵylymı jobalardy bastap, qorǵaýǵa múmkindik mol. Máselen ár balaǵa tusbaǵdar taratyp bere alady. Matematıka páninde qoldanylatyn kórnekilik quraldary da ár oqýshyǵa bólek úlestiriledi. Joǵary synyp oqýshylaryna arnalǵan pán kabınetteri túgel. Fızıka, hımııa páni muǵalimderi tek orta býynmen shektelip qalmaıdy, bastaýysh synyp oqýshylarymen, pedagogtermen birge jumys isteıdi, — dedi № 80 jalpy bilim beretin orta mektep dırektory Aısulý Jaqsybaeva.
Mektepte tórt sport zaly bar. Bastaýysh jáne joǵary synyp oqýshylary dene shynyqtyrý pánin bólek ótkizedi. Bul qaýipsizdik sharasy. Mektep aýlasynda fýtbol, voleıbol, basketbol jáne hokkeı alańy ornalasqan. Qysta konkı men shańǵy tebýge bolady. Mektepte barlyǵy 20-dan astam tegin úıirme jumys isteıdi. Bı úıirmesiniń tárbıelenýshileri bes halyqaralyq, eki respýblıkalyq baıqaýǵa qatysty. 11-synyp oqýshylary pikirsaıysqa qatysyp, joǵary oqý ornynyń grantyn jeńip aldy. Muǵalimder de pikirsaıysta respýblıkalyq týrnırlerge qatysyp, jeńimpazy atandy.
— Eńbek kabınetinde tigin mashınasy, ıne men jip te jetkilikti. Tamaqtaný kabınetinde as ázirleýge bolady, qyzdar dastarhan jaıýdy da úırenedi. Er balalar arnaıy qural-saımanmen temir, aǵash óńdeýdi meńgeredi. Beıneleý kabınetinde balalar sýret salady, shyǵarmashylyqpen aınalysady. Al STEM zerthanasy, robototehnıkany meńgergen balalar byltyr alǵashqy jeńisine qol jetkizdi. Kishi jáne orta top balalary Astana, Qyzylorda qalalaryna baryp, respýblıkalyq baıqaýǵa qatysty. Jyl qorytyndysy boıynsha Aqtóbe qalasynyń jalpy bilim beretin orta mektepteri arasynda júrgizilgen monıtorıng qorytyndysy boıynsha І-oryndy ıelendik. Eriktiler toby bar ári «Jas memlekettik qyzmetshi» synyby ashyldy. Oqýshylar ákimdikke baryp, memlekettik qyzmetshilermen kezdesip, túrli taqyrypty talqylady. Bul mamandyq tańdaýǵa da septigin tıgizedi dep oılaımyz, — dedi Aısulý Jaqsybaeva.
Byltyrǵy oqý jylynda 22 túlek mektep bitirdi. Olardyń teń jartysy memlekettik grant ıegeri atandy. Bıyl 1-synypqa 300-den astam bala qabyldandy. Barlyǵy 14 synyp jasaqtaldy. Sonymen birge ózge mektepten aýysyp kelgen oqýshylar da qabyldandy. Kóbi Altyn orda shaǵyn aýdanyndaǵy jeke mektepterden aýysty. Mektepte 74 bala ınklıýzıvti bilim alady. Onyń 26-na pedagog-assıstent bólindi. Jalpy bilim ordasynda 130 pedagog jumys isteıdi.
— Qaýipsizdik úshin daıarlyq toby men bastaýysh synyp oqýshylaryna bólek kirý esigi qarastyryldy. Sonymen birge oqýshy mektepke «Alaqan» júıesi arqyly kiredi. Ashanada da osy júıeni qoldanady. Ata-ana as mázirin kórip otyrady. Ári mektepte 178 beınebaqylaý kamerasy bar. Kameralar dálizderge, jedelsaty men sport, májilis zaldary, ashana, mektep aýmaǵyna qondyrylǵan. Barlyǵy da polıtsııanyń Jedel basqarý ortalyǵyna qosylǵan. Kúzet qyzmetinen ózge ár blokqa polıtsııa dabyl batyrmasy qondyryldy. Dabyl batyrmasynda beınebaqylaý kamerasy jumys isteıdi, — Aısulý Jaqsybaeva.
Aıta keteıik, úsh jyl ishinde joba aıasynda 460 myń oqýshyǵa arnalǵan jańa formattaǵy 217 mektep salyndy: 2024 jyly 105 mektep, 2025 jyly 112 mektep paıdalanýǵa berildi. Nátıjesinde 54 úsh aýysymdy jáne 12 apatty mektep máselesi tolyǵymen sheshildi, sondaı-aq 100-den astam mektepte oqýshy oryndarynyń tapshylyǵy qysqardy.
