Aqtóbede úsh aýdannyń ákimin saılaýǵa 136 mln teńge bólindi

AQTÓBE. QazAqparat – Aqtóbe oblysynda bıyl 3 aýdannyń ákimi saılanady. Depýtattar qoǵamdyq-saıası jaǵdaıyna, halyqtyń bılikke degen senimine basymdyq berip, Qobda, Yrǵyz, Oıyl aýdandaryn tańdady, dep habarlaıdy QazAqparat tilshisi.

2021 jyldan bastap elimizde aýyldyq okrýg ákimderi saılanyp keledi.

Sodan beri Aqtóbede 101 aýyldyq okrýg pen aýdandyq mańyzy bar qalada ákim tańdaldy. Jyl sońyna deıin taǵy da 11 aýyldyq okrýgte saılaý ótýi tıis.

Sonymen birge aýdandarda ákim saınalady.

«Depýtattar oblystaǵy 12 aýdan ishinen úsh aýdandy iriktedi. Negizinen qoǵamdyq-saıası jaǵdaıy turaqty, halyqtyń bılikke degen senimi joǵary, elektoraldy belsendiligi joǵary Yrǵyz, Qobda, Oıyl aýdardary usynyldy. Bul aýdandarda sońǵy saılaýda qatysym kóp boldy»,- dedi oblystyq máslıhat depýtaty Aıgúl Dúısenova.

Aıta keteıik, aýdan ákimderin saılaý kezinde jergilikti bıýdjetten 136 mln teńge bólindi.

Orta eseppen bir aýdanǵa 45 mln teńge qarastyrylady.

«Saılaý týraly» zańǵa sáıkes kandıdattardy saıası partııalar óz músheleri arasynan usynady. Sonymen birge ózin-ózi usynýǵa bolady. Eger usynym ýaqyty aıaqtalar kezde eki adamnan az kandıdat bolsa, aýdandyq saılaý komıssııasy taǵy úsh kún ýaqyt beredi. Odan joǵary turǵan ákim eki nemese bir kandıdatty usynýǵa quqyly»,- dedi Aqtóbe oblystyq saılaý komıssııasynyń tóraǵasy Nurlybek Júsipov.