Aqtóbede úsh adam menıngokokk juqpasynan emdeldi
AQTÓBE. QazAqparat - Aqtóbe oblysynda úsh adam menıngokokk juqpasynan emdeldi. Onyń bireýi jeti aılyq kezinde dertke shaldyǵyp, aýrýhana em qabyldady, dep habarlaıdy QazAqparat tilshisi.
Elimizde menıngokokk juqpasy balalardan jıi anyqtalyp, qazir aımaqtarda aldyn alý sharasy kúsheıtildi.
«Jyl basynan beri Aqtóbe oblysynda menıngokokk juqpasy úsh adamnan anyqtaldy. Olardyń ekeýi bala. Bireýi bir jasqa da tolmaǵan. 2017 jyly týǵan bala 30 sáýir kúni aýyryp, 1 mamyr kúni medıtsınalyq kómekke júgingen. Bala aýrýhanada emdeldi. Ata-ana der kezinde medıtsınalyq kómekke júginip, dárigerler qajetti shara qoldana bildi», - dep habarlady Aqtóbe oblystyq qoǵamdyq densaýlyq saqtaý basqarmasynyń baspasóz qyzmeti.
Aqtóbede menıngokokk juqpasynyń aldyn alý maqsatynda oblystyq densaýlyq saqtaý basqarmasynda medıtsına qyzmetkerlerine arnap arnaıy semınar ótkizildi. Turǵyndar arasynda aqparattyq nusqamalar berilip, áleýmettik jelige juqpadan saqtaný joldary taratyldy. Mektepke deıingi mekemelerde baqylaýdy kúsheıtip, balabaqshaǵa barmaı júrgen balalarǵa monıtorıng jasalyp jatyr.
«Halyq kóp shoǵyrlanatyn jabyq ǵımarattarǵa barýdy shekteý qajet. Taza aýada jıi tynyǵyp, aýrý belgileri anyqtalǵanda birden medıtsınalyq kómekke júgingen jón. Eger otbasynda bir adamnan aýrý belgisi anyqtalsa, onyń janyndaǵy adamdar 10 kún boıy dáriger baqylaýynda bolady»,- dedi habarlady baspasóz qyzmeti.
