Aqtóbede urylar páterdiń esigi men terezesin ońaı ashyp kiredi
AQTÓBE. QazAqparat - Aqtóbede páter tonaý, kóliktiń akkýmýlıatoryn, baǵaly zattardy urlaý deregi jıi tirkeledi. Bul týraly búgin turǵyndarmen kezdesken qalalyq ishki ister bóliminiń bastyǵy Baǵlanbek Qurmanalın aıtty, dep habarlaıdy QazAqparat tilshisi.
Aqtóbe qalasyndaǵy tórt bólimshede azamattardy qabyldaý júrgizildi. Qala turǵyndary polıtsııa qyzmetkerlerimen kezdesip, ózderin mazalaǵan suraqtardy qoıdy.
«Sazdy polıtsııa bóliminde 7500-den astam qylmys tirkelip tur. Kóbi - páter tonaý, qalta urlyǵy. Qala boıynsha qazir 500-den astam páterdiń tonalǵany anyqtaldy. Bul qylmystyń kóbi ashylmaı tur. Qazirgi kezde 5 urylar toby ustaldy. Keıbiri18 epızod boıynsha jaýapty. Páter tonaý dereginiń kóbeıýine adamdardyń tańerteń ketip, jumystan keshke kelýi sebep. Osy aralyqta úıde eshkim bolmaıdy. Urylar úıdiń esigin qaǵyp, qońyraýyn basyp, jaýap bolmaǵan soń Qytaıda jasalǵan esikterdi kiltimen ashady. Qazir plastıkalyq terezeni ashý da qıyn emes. Jedel ýákilderdiń kóbi osy baǵyttaǵy qylmysty ashýǵa baǵyttalǵan»,- dedi Aqtóbe qalalyq ІІB bastyǵy Baǵlanbek Qurmanalın.
Aıta keteıik, Aqtóbede kólik aınasyn urlaý deregi tirkelmedi. Kóbine akkýmýlıatoryn sheship alyp, kólik ishindegi sómkelerdi urlap ketedi. Qazirgi kezde polıtsııa turǵyn úılerdegi zeınetkerlerge ótinish jasady. Sebebi, kórshiler saq bolsa, urlyqshylardy ustaý ońaı.
«Kórshilerdiń eńbegi zor. Olar saq otyryp, polıtsııaǵa habar beredi. Tájirıbede páter tonaý deregin ýaqytyly habarlap, urlyq jasaýshylar der kezinde ustaldy. Al habarlama bergen qarııalar syıaqy aldy»,- dedi Baǵlanbek Qurmanalın.
