Aqtóbede ýnıversıtettiń saýnasy men murajaıyn jóndegen jumysshylar eńbekaqylaryn talap etti
AQTÓBE. QazAqparat - Q.Jubanov atyndaǵy Aqtóbe óńirlik memlekettik ýnıversıtetiniń saýnasy men dáris oqylatyn zaldaryn, murajaıyn jóndep bergen bir top jumysshy búgin eńbekaqylaryn talap etti. Olar ózderine tıesili 16 mıllıon teńgeni surady, dep habarlaıdy QazAqparat tilshisi.
Aqtóbedegi iri memlekettik ýnıversıtetti 2017 jyldyń qazan aıynan beri jóndep, birneshe dáris oqylatyn zaly, horeografııa zaly men Qudaıbergen Jubanovtyń murajaıyn qalpyna keltirip bergen jumysshylar eńbekaqylaryn talap etti.
«2017 jyldyń 1 qazanynan beri úzdiksiz jumys istedik. Eńbekaqymyzdy ala alaı júrgenimizge 1 jylǵa jýyq ýaqyt boldy. Negizi ýnıversıtettiń qyzmetkeri Tımýr Ekibasovpen kelisip, aýyzeki tilde ýaǵdalasqan edik. Biz sendik. Sebebi, buǵan deıin de 30 mıllıon teńgeniń jumysyn jasap, olar bizge tóledi. Al sońǵy jumysymyzdyń aqysy tólenbedi. Barlyǵy 16 mıllıon teńgeni qurap otyr»,- dedi Asqar Atybaev.
Onyń aıtýynsha, jumysshylar ákteý, syrlaý, qabyrǵa tegisteý, qysh taqta japsyrý, eden jóndeý sekildi birneshe jumysty atqarǵan. Olar qurylys jumystary kezinde barlyq qajetti materıaldardy satýshylardan qaryzǵa alyp, keıde kúni-túni eńbek etken. Al qabyldaý jumystary, kem-ketikti jóndeý tapsyrmalary ekijaqty kelisimmen júrgizilgen.
«Ýnıversıtettiń sport kesheninde saýna bar. Buryn jumys istemeı turǵan saýnany 2017 jyly jóndep berdik. Bul jer qarapaıym stýdentterge arnalmaǵan, tek basshylar keledi»,- dedi jumys tobynyń jetekshisi Asqar Atybaev.
Rektormen kezdesý úshin barǵan jumysshylardy joǵary oqý ornyna kúzet qyzmeti kirgizbedi. Keıin «tártipke baǵynbaıdy» dep polıtsııa qyzmetkerin shaqyrdy.
Arada biraz ýaqyt ótkende ýnıversıtet rektory Baýyrjan Erdembekov tek jýrnalısterdi qabyldap, ózine jala jaýyp otyrǵan jumysshylarmen sottasýǵa ázir ekenin jetkizdi.
«Jumys tobyn tanımyn. Olar Grıshın kóshesindegi jataqhanany jóndeý jumystaryn júrgizdi. Sol kezde qaryzymyz óteldi, 59 mıllıon teńge tólendi. Al birneshe dáris zaly, horeografııa jóndeldi dep aıtsa, onyń bárin adamdar qaryzǵa jasamaıdy. Bizdi tekseredi, jóndelse báriniń aqysy memlekettik satyp alý arqyly berildi. Qazir kelip otyrǵan jumysshylar sol jerde jumys istese, olardy jalǵa alǵan adamdar nege aqysyn tólemedi? Oǵan men jaýapty emespin. Olar zań aıasynda sotqa, prokýratýraǵa, qarjy departamentine shaǵym túsire alady. Bizdiń qujattarymyz bar, aqysy tólengen. Kósheden kelip, maǵan aqsha ber dep aıtqandardyń bárine tóleı almaımyz. Men olardyń sózin jalǵan dep aıtamyn»,- dedi rektor Baýyrjan Erdembekov.
Ýnıversıtet rektory Baýyrjan Erdembekov joǵary oqý ornynda saýnanyń bar ekenin jasyrmady, biraq demalys orny 10 jyldan beri jabyq turǵanyn aıtyp berdi.
«Saýna jabyq tur, jumys istemeıdi. Saýna jóndelmedi, ony kórsete almaımyz. Bul aqsha alýdyń, bopsalaýdyń túri dep bilemin. Jumysshylarmen kezdespeımin. Olar sotqa berse, ýnıversıttiń atyna, meniń jeke basyma jala japqany úshin sotqa beremin»,- dedi Baýyrjan Erdembekov.
Aıta keteıik, eńbekaqyny talap etken jumysshylarda kelisimshart joq. Olar ózderiniń jumys istegenin sýretterimen, eger múmkindik bolsa ýnıversıettiń beınebaqylaý kamerasy arqyly dáleldeıtinin jetkizdi. Sebebi, jumysshylar kúndiz ǵana emes, memlekettik joǵary oqý ornynda túngi ýaqytta ja jóndeý jumystaryn júrgizgen. 
