Aqtóbede ýnıversıtet qyzmetkeri stýdentterdiń oqý aqysyn jeke qajettiligine jumsaǵan

AQTÓBE. KAZINFORM - Halyqaralyq kólik-gýmanıtarlyq ýnıversıteti Aqtóbe fılıalynyń jetekshi mamany 2016-2023 jyldary aralyǵynda stýdentterdiń oqý aqysyn jeke shotyna aýdartyp otyrǵan. Shyǵyn 14,5 mln teńgeden asyp, sottalýshy shartty túrde bas bostandyǵynan aıyryldy.

Іs aldymen Aqtóbe qalasyndaǵy №2 sotynda qaraldy.

Іs materıalyna súıensek, sottalýshy 2016-2023 jyldar aralyǵynda Halyqaralyq kólik-gýmanıtarlyq ýnıversıtetiniń jetekshi maman bolyp jumys istep, birneshe ret stýdentterdiń oqý aqysyn óz jeke shotyna aýdartyp, aqshany óz qajettiligine jumsaǵan.

Tergeý Qylmystyq kodekstiń «Alaıaqtyq» baby boıynsha júrgizilip, sotqa jetti. Keltirilgen zalal mólsheri 14 558 980 teńgeni qurady.

Birinshi satydaǵy sottyń sheshimimen sottalýshy kináli dep tanylyp, oǵan 3 jyl merzimge bas bostandyǵynan aıyrý jazasy taǵaıyndaldy. Jábirlenýshilerdiń materıaldyq shyǵyndy óndirý týraly azamattyq talaptary qanaǵattandyryldy.

Keıin is apellıatsııalyq satyda qaraldy. Onda sottalýshynyń ókinetini, shyǵyn tolyq qaıtarylǵany, kámeletke tolmaǵan 3 balasy bary eskerildi. 

- Sot alqasy sotta anyqtalǵan mán-jaılardy eskere otyryp, sottalǵanǵa baptyń sanktsııa sheńberinde bas bostandyǵyn shekteý jazasyn taǵaıyndaý múmkin degen tujyrymǵa keldi. Sot alqasy jazanyń bul túri sottalǵannyń túzelýine jáne jańa qylmystyq quqyq buzýshylyqtar jasaýyn aldyn-alýǵa jetkilikti dep sanaıdy. Apellıatsııalyq alqanyń qaýlysymen birinshi satydaǵy sottyń úkimi ózgertilip, T-ǵa taǵaıyndalǵan jaza 3 jylǵa bas bostandyǵyn shekteý jazasyna aýystyryldy.

Sonymen qatar, sottalǵan azamat jylyna 100 saǵattan májbúrli eńbekke tartyldy. Apellıatsııalyq qaýly zańdy kúshine endi, - dep habarlady Aqtóbe oblystyq sotynyń baspasóz qyzmeti.

Eske salsaq, qazirgi kúni balalardyń emine dep aqsha jınap, óz paıdasyna jumsaǵan qoǵamdyq qor dırektoryna qatysty is sotta qaralyp jatyr.