Aqtóbede uńǵymadan aqqan munaı aralas suıyqtyq 3 myń sharshy metr aýmaqty lastady
AQTÓBE. QazAqparat - Aqtóbe oblysynda munaı uńǵymasynan beımálim suıyqtyq aǵyp, aınalany lastaǵan, dep habarlaıdy QazAqparat.
31 qazan kúni Aqtóbe oblysynyń ekologııa departamentine «SNPS Aqtóbemunaıgaz» AQ qarasty «Keńqııaqmunaı» KMGDB №797 uńǵymasynan suıyqtyq aqqany týraly habar túsken.
Atalǵan derek boıynsha departament ınspektory oqıǵa ornyna bardy.
Onyń barysynda mynadaı keleńsiz jaıt anyqtaldy.
«29 qazan saǵat 22.30 shamasynda №797 uńǵymada negizgi oqpannyń dánekerleý tigisi jarylǵan. Lastanǵan aýmaqtyń kólemi - 3168 sharshy metr (66*48). Apat saldaryn joıýmen «Aqberen» JShS aınalysady» delingen mınıstrlik taratqan aqparatta.
Apat bolǵan jerdi tekserý barysynda №797 uńǵymadan munaı lastaǵan sý áli aǵyp jatqany belgili boldy.
Lastanǵan aýmaq ólshenip, synama alyndy. Kásiporyn ókilderiniń qatysýymen akt jasaldy.
Departament oryn alǵan jaǵdaıǵa qatysty jospardan tys tekserý júrgizedi.
