Aqtóbede «Uly Dala rýhy» festıvali ótedi
AQTÓBE. QazAqparat - Búgin Aqtóbedegi ortalyq ıppodromda «Uly Dala rýhy» ulttyq sport túrleri festıvaliniń irikteý satysy bastaldy, dep habarlaıdy QazAqparat.
Bul týraly Aqtóbe oblysynyń Óńirlik kommýnıkatsııalar qyzmetindegi baspasóz konferentsııasynda Qazaqstan Respýblıkasy Mádenıet jáne sport mınıstrligi Sport jáne dene shynyqtyrý isteri komıtetiniń basqarma basshysy Qarlyǵash Ramazanova aıtty.
Shildeniń 27-si men 29 aralyǵynda respýblıkalyq sporttyq is-shara aıasynda ortalyq ıppodromda jáne «Jekpe-jek saraıy» kesheninde birqatar jarystar ótedi.
«Olarǵa Aqtóbe, Atyraý, Batys Qazaqstan jáne Mańǵystaý oblystarynyń komandalary, barlyǵy 160 sportshy qatysady. Olar úsh kún boıyna kókpar tartýdan, qazaqsha kúresten, toǵyz qumalaqtan, asyq atýdan jarysady. Jeńimpazdar men júldegerler QR Mádenıet jáne sport mınıstrliginiń kýboktarymen jáne medaldarymen marapattalady», - dedi Mınıstrlik ókili.
20-22 shildede Astana qalasyndaǵy «Qazanat» ıppodromynda aýdaryspaqtan, jamby atýdan, teńge ilýden jarystar ótkenin aıta keteıik. Aýdaryspaqtan 5 salmaq dárejesi boıynsha kúshtini anyqtaýǵa 20 sportshy talasty, sondaı-aq, eń mergen sportshy men teńge ilýdiń úzdigi tańdalyndy. Astanada ótken oıyndar qorytyndysy boıynsha Aqtóbe oblysynyń komandasy jamby atýdan 1-shi oryn alǵanyn maqtanyshpen aıta keteıik.
