Aqtóbede Ulttyq ulan qyzmetkeri qyzdy seksýaldyq zorlyqtan qutqardy
AQTÓBE. QazAqparat – Aqtóbede «Batys» óńirlik qolbasshylyǵyna qarasty 6655-áskerı bóliminiń qyzmetkeri, efreıtor Andreı Petrov qyzdy zorlyqtan qutqaryp qaldy, dep habarlaıdy QazAqparat tilshisi.
QR Ulttyq ulany «Batys» óńirlik qolbasshylyǵynyń baspasóz qyzmetinen málim etkenindeı, oqıǵa 15 maýsymǵa qaraǵan túni saǵat 03.00 shamasynda boldy.
Andreı óz páteriniń balkonyna shyqqan kezde kómekke shaqyrǵan áıeldiń daýsyn estıdi. Aıaq kıimin kıe sala, syrtqa júgirip shyqqan ol, butalardyń arasynda áıelge seksýaldyq sıpattaǵy zorlyq-zombylyq kórsetip jatqan er adamdy kóredi. Ony birden shetke ıterip jiberip, qoıan-qoltyq urys tásilimen jyǵady da, 102 telefonyna qońyraý shalady. Polıtseıler kelgenge deıin sytylyp ketýge tyrysqan kúdiktini jibermeı ustap turǵan.
«Bul – erlik emes. Kez kelgen adam osylaı jasar edi. Kómekke shaqyrǵan adamǵa qol ushyn berý – árkimniń de boryshy», - deıdi efreıtor A.Petrov.
Ulttyq ulan jaýyngerine alǵysyn bildirgen jábirlenýshi polıtsııaǵa shaǵym túsirdi.
Ustalǵan er adam ýaqytsha oqshaýlaý ızolıatoryna qamalyp, tergeý amaldary júrgizilýde.
Qyraǵylyq pen batyl is-áreketi úshin 6655-áskerı bólim komandıri, polkovnık Mıras Turdalın efreıtor Andreı Petrovqa saltanatty túrde maqtaý qaǵazy men baǵaly syılyq tabys etti.
Aıta keteıik, Andreı – Jem qalasynyń túlegi, Ulttyq ulanda 2017 jyldan beri qyzmet etedi.
