Aqtóbede úlken saıabaq salynyp jatyr
AQTÓBE. QazAqparat - Aqtóbe qalasynda elimizdiń batys óńiri boıynsha eń úlken saıabaq salynyp jatyr. Eki aıdan soń qurylysy aıaqtalyp, paıdalanýǵa beriledi, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.
Aqtóbe qalasynyń Keńes Nokın men 312-atqyshtar dıvızııasy dańǵyldarynyń qıylysyna saıabaq salynyp jatyr. Aýmaǵy 3,5 ga bolatyn saıabaq qurylysyna 658 mıllıon teńge ınvestıtsııa jumsaldy. Óńir basshysy Beribek Saparbaev qurylys jumystarymen tanysyp, eki aıdan soń saıabaqty qoldanysqa berýdi tapsyrdy.
«Balalar men eresekterge arnalǵan otbasylyq saıabaq demalys pen oıyn-saýyqty biriktirýge múmkindik beredi. Jabdyqtarǵa tapsyrys berildi, jetkizilip jatyr», - dedi tapsyrys berýshi «NuraiInvestGroup» kompanııasynyń dırektory Erbol Muhamedjan. Jańa saıabaq Balalardy qorǵaý kúni paıdalanýǵa beriledi. Munda haıýanattar parki, etnoaýyl, uıaly planetarıı, mını-golf alańy, jazǵy kitaphana, úlken labırınt, quzǵa órmeleý, muz aıdyny, sport jáne oıyn alańdary, batýttar, tır, boýlıng bolady.
Aıta keteıik, demalys saıabaǵynyń qurylysy keshendi túrde júrgiziledi. Aldaǵy eki jylda quny 9 mıllıard teńge bolatyn keshen iske qosylady.
«Keshenniń jalpy aýdany 40 myń sharshy metrdi quraıdy. Bul batys óńirindegi jáne Qazaqstandaǵy eń iri saıabaqtar tizimine enetin bolady. Segiz qabatty ǵımarat úsh bloktan turady: iskerlik-ákimshilik, sporttyq-saýyqtyrý jáne mádenı demalys oıyn-saýyq bolyp bólinedi», - dedi Erbol Muhamedjan.
Aýmaqty abattandyrý kezinde 500-ge jýyq shyrsha jáne kanadalyq úıeńki otyrǵyzylady.
