Aqtóbede úlgili stýdentter oblys ákiminiń stıpendııasyn aldy
AQTÓBE. QazAqparat - Aqtóbedegi joǵary oqý oryndary men kolledjderde bilim alatyn 285 stýdent oblys ákiminiń stıpendııasyn aldy. Sonymen qatar, olarǵa «Jas Aqtóbe» jastar syılyǵy berildi, dep habarlaıdy QazAqparat tilshisi.
Búgin Aqtóbe jastary úshin qýanyshty kún. «Men Aqtóbeni tańdaımyn!» jastar keshine jastar uıymdary, belsendiler, aýdandaǵy jastar, joǵary oqý orny men kolledj stýdentteri qatysty. Merekelik sharaǵa «Jasyl el» jastar eńbek jasaqtary respýblıkalyq shtabynyń tóraǵasy Toqtar Bolysov, «Qazaqstan KTK Odaǵy» jastar qoǵamdyq birlestiginiń tóraǵasy Esen Eleýken de keldi. Barlyǵy 285 stýdent arnaıy Aqtóbe oblysy ákiminiń stıpendııasyn ıelendi. Olar: az qamtylǵan otbasylardyń balalary, úzdik, belsendi stýdentter. Joǵary oqý oryndarynyń 220 stýdentine 140 myń teńgeden, al kolledjdiń 65 stýdentine 80 myń teńgeden stıpendııa taǵaıyndaldy.
«Árbir ulttyń, memlekettiń, qoǵamnyń damýy jastarǵa baılanysty. Jastarda jiger, qaırat, jańashyldyq, izdenimpazdyq bar. Sondyqtan árbir memleket óz bolashaǵy úshin jastarǵa úlken kóńil bóledi. Shırek ǵasyrda Qazaqstan, Memleket basshysy Nursultan Nazarbaev jastarǵa qamqorlyq kórsetip keledi. Qazir jastardyń arqasynda Qazaqstandy, qazaqty búkil dúnıejúzi biledi. Bizdiń jastarymyz mádenıette, bilimde, ónerde, sportta Qazaqstannyń atyn shyǵaryp, abyroıyn bıiktetip júr. Qazirgi tańda Qazaqstanda Aqtóbe jastarynyń alar orny bar. Aqtóbe jastary Qazaqstan syılaıdy, qurmetteıdi. Qazaqstannyń jetken jetistikterinde Aqtóbe jastarynyń da úlken úlesi bar. Búgingi shara «Men Aqtóbeni tańdaımyn» dep ataldy. Árbir adamnyń kindik qany tamǵan týǵan jeri bolady. Ol óziniń shamasy kelgenshe sol jerge eńbek etedi. Árbir qazaqstandyq azamat, onyń ishinde jastar óziniń elin, óz ultyn súıip ósýi kerek. Óz Otanyna eńbek etýi tıis. Eńbegimen, bilimi, ónerimen óz memleketiniń, ultynyń abyroıyn asqaqtatý kerek. Jastar men aqtóbelikpin dep maqtanýy kerek. Men Aqtóbede bilim aldym, tárbıe aldym, qazir Aqtóbeniń atyn shyǵaryp júrmin dep aıtýy tıis»,- dedi Aqtóbe oblysynyń ákimi Berdibek Saparbaev.
Óńir basshysy stıpendııa taǵaıyndaý kezinde muqııat bolýdy, asa muqtaj otbasy balalaryna qoldaý kórsetýdi tapsyrǵan bolatyn. Aqtóbe oblysy, Yrǵyz aýdanynan kelip, bilim alyp júrgen Qolǵanat Baqytjan sporttyq jarystarǵa jıi qatysady. Ol respýblıkalyq jarystarda jeńimpaz atanyp júr. Anasy poshta qyzmetkeri, ákesi 1986 jyly el táýelsizdigi úshin alańǵa shyqqan jastardyń qatarynan tabyldy.
«Ájem Shahızat Amantaeva pedagog. Ol bizge jaqsy tárbıe, bilim berdi. Qazir men ýnıversıtette memlekettik jáne jergilikti basqarý mamandyǵy boıynsha bilim alyp júrmin. Búgin Aqtóbe oblysy ákiminiń stıpendııasyna ıe boldym. Stıpendııany sýbsıdııa retinde qabyldadym. Alda jumys istep, senimdi aqtaımyn. Qoǵamǵa qanshalyqty kóp paıdań tıse, qoǵam da saǵan kómek beredi»,- dedi stýdent.
Al Aqtóbedegi jeke kompanııada ekolog bolyp jumys isteıtin Berdaly Sársenov búgin úzdik erikti atandy.
«Júrekten júrekke» eriktiler tobynyń múshesimin. Biz qaıyrymdylyq jáne qoǵamdyq is sharalarǵa qatysyp, múgedekterge kómek kórsetemiz. Muqtaj otbasylarǵa, qarttar úıine, balalar úıine baryp, kontserttik baǵdarlamalarymyzdy usynamyz, syılyq tartý etemiz. Eki jyl buryn áleýmettik jeli arqyly bilip, qatarǵa qosyldym. Bos ýaqytymdy tıimdi ótkizip, adamdarǵa kómek kórsetýdi paryz sanaımyn. Sebebi, múgedek jandar bizdiń qamqorlyǵymyzǵa zárý»,- dedi «Eń úzdik erikti» nomınatsııasynyń jeńimpazy Berdaly Sársenov.
«Jas Aqtóbe» jastar syılyǵy ıelerine 100 myń teńge men dıplom berildi. Úzdik shyǵarmashylyq ujym, jas kóshbasshy, óndiris salasyndaǵy jas maman, jastar keńesi, jastar isi jónindegi komıtet, quqyq qorǵaý organdarynyń úzdik jas qyzmetkeri anyqtaldy.
Aıta keteıik, Aqtóbede 13 jastar resýrstyq ortalyǵy bar. «Jasyl el», «Dıplommen aýylǵa», «Serpin-2050» baǵdarlamasy men Jastar tájirıbesi iske asyrylyp jatyr. Bıyl «Dıplommen aýylǵa» baǵdarlamasy aıasynda 220 jas aýylǵa bardy. Al «Serpin-2050» baǵdarlamasy aıasynda Almaty, Ońtústik Qazaqstan, Jambyl, Qyzylorda, Mańǵystaý oblystarynan kelgen 600 stýdent arnaıy bilim alyp jatyr. «Jasyl el» jasaqtary jyl boıy jumys isteıdi. Bıyl 5 myńǵa jýyq jas jumyspen qamtamasyz etildi. Statıstıkaǵa súıensek, Aqtóbede Úndistan, Mońǵolııa, Ózbekstan, Qyrǵyzstan, Reseı, Tájikstannan kelgen jastar bilim alyp júr.
