Aqtóbede úleskerlerge 6 mlrd teńgeden astam zalal keltirgen ister tergelip jatyr

AQTÓBE. KAZINFORM – Aqtóbe oblysynyń prokýratýrasy úleskerlerdiń quqyqtaryn qorǵaý baǵytynda júıeli jumys júrgizip keledi.

Óńirde 12 problemalyq úlestik qurylys nysany anyqtalǵan. Olarǵa qatysty 797 jábirlenýshi bar, jalpy keltirilgen zalal kólemi 6,1 mlrd teńgeni quraıdy.

- Mysaly, «Alash orda-1» jáne «Aviator Premium» turǵyn úı keshenderiniń qurylys salýshylary alaıaqtyq jolmen 200-den astam úleskerdiń qarajatyn tartyp, 1,8 mlrd teńgeden astam shyǵyn keltirgen.

Oblys prokýratýrasynyń sharalary nátıjesinde bıyl 7 qurylys kompanııasynyń basshylary 11 nysan boıynsha qylmystyq jaýapkershilikke tartyldy, - dep jazdy baqylaýshy organnan.

Sot úkimimen «Safina.kz» jáne «StroıServısRegıon» turǵyn úı keshenderiniń qurylys salýshylary 300-den astam úleskerdiń aqshasyn alaıaqtyq jolmen ıemdengeni úshin 10 jylǵa bas bostandyǵynan aıyryldy.

Prokýratýra azamattyq tártipte 413 úleskerdiń múddesinde 8 talap-aryz berip, turǵyn úı satý-satyp alý sharttaryn jaramsyz dep taný jáne múlikti qaıtarý týraly talap qoıǵan.

- 6 talap-aryz boıynsha 285 úleskerdiń múddesi qorǵaldy, al 3 nysan boıynsha 128 úleskerdiń isteri sot qaraýynda, - delingen aqparatta.

Prokýratýra turaqty túrde turǵyn úı qurylysy kezinde halyqtyń qarajatyn zańsyz tartý faktilerin anyqtaý maqsatynda monıtorıng júrgizip otyr. Barlyq problemalyq nysandar oblys prokýratýrasynyń baqylaýynda.

Aıta keteıik, úlesker qurylys nysanynyń kepildigi baryn bank qosymshasy arqyly teksere alady.