Aqtóbede úleskerlerge 3 mlrd teńge shyǵyn keltirgen turǵyn úı kooperatıviniń basshysy sottaldy

AQTÓBE. KAZINFORM - Aqtóbede «Safina.kz» turǵyn úı kooperatıviniń tóraǵasyna qatysty sot úkimi shyqty. Kúdikti 312 úleskerge 2,9 mlrd teńge shyǵyn keltirgen.

№2 Aqtóbe qalalyq sotynda B.T.Karımov, A.M.Jarashanovqa qatysty Qylmystyq kodekstiń “Alaıaqtyq” baby boıynsha is qaraldy. Іs materıalyna súıensek, «Safina.kz» turǵyn úı kooperatıviniń tóraǵasy B.T. Karımov 2019-2022 jyldary aralyǵynda atalǵan turǵyn úı kesheni men «StroıServıs-Regıon» turǵyn úı-qurylys kooperatıviniń úleskerlerine tórt kópqabatty úı salýǵa ýáde etedi.

Ol 312 úleskerden barlyǵy 2 933 352 400 teńge jınap, qurylys-montaj jumystaryn júrgize bastaıdy. Alaıda jumysty aıaǵyna deıin jetkizbeı, zańsyz toqtatyp tastaǵan. 

Keıin «AktobeKazahFınans» JShS-niń dırektory A.M.Jarashanov B.T. Karımovpen kelisip, 2022-2023 jyldary aralyǵynda «Safina.kz» turǵyn úı kesheni men «StroıServıs-Regıon» turǵyn úı-qurylys kooperatıvine tıesili 4 úıdiń qurylysyn aıaqtaýǵa ýáde etedi. Sol kezde 140 úleskerdiń 227 058 375 teńgesi ıelendi. №2 Aqtóbe qalalyq sotynyń baspasóz qyzmetiniń habarlaýynsha, A.Jarashanov eki nysanda qurylys júrgizbeı, eki nysannyń jobalyq-smetalyq qujatynan aýytqyp, 5 qabattyń ornyna 6 jáne 7 qabatty turǵyzǵan. Osylaısha qosymsha paıda tapqan. 

- B.T. Karımov, A.M.Jarashanovtyń kinási úleskerlerdiń sózimen, qujatymen, sot-qurylys saraptamasymen, qarjylyq qujattamamen jáne nysandy salý qujatymen rastaldy. B.T. Karımov óz kinásin moıyndady, A.M.Jarashanov moıyndamady. Sot úkimimen B.T.Karımov, A.M.Jarashanov kináli dep tanyldy. B.T.Karımov 6 jyl 8 aıǵa bas bostandyǵynan aıyryldy. A.M.Jarashanov 6 jylǵa bas bostandyǵynan aıyryldy, - dep habarlady № 2 Aqtóbe qalalyq sotynyń baspasóz qyzmeti.

Sot úkimi zańdy kúshine engen joq.