Aqtóbede úleskerlerdiń quqyqtaryn buzǵan qurylysshylar jaýapqa tartyldy

AQTÓBE.KAZINFORM - Oblys prokýrory Marat Ábishev zańsyz áreketterinen zardap shekken úleskerlerdi jeke qabyldady, Aqtóbe oblystyq prokýratýrasynyń baspasóz qyzmeti.

Atap aıtqanda, «KAZYNA PREMIUM» turǵyn úı kesheniniń úleskerlerin alańdatqan lıft ornatý jáne aýmaqty abattandyrý máseleleri qaraldy.

Kezdesý barysynda azamattarǵa úlestik qurylysqa qarajat tartýǵa qatysty zań normalary, sondaı-aq tıisti ruqsat qujattarynsyz qurylys júrgizýdiń saldary, onyń ishinde nysandardy paıdalanýǵa berý merzimderiniń buzylýy jáne salynǵan qarajatty joǵaltý táýekelderi túsindirildi.

Buǵan deıin prokýratýranyń qadaǵalaý qyzmeti aıasynda úleskerlerdiń qarajatyn zańsyz tartqan kompanııalar anyqtalǵan.

11 problemalyq nysan boıynsha josyqsyz qurylys salýshylarǵa qatysty 5 aıyptaý úkimi shyǵaryldy.

Sot 800-ge jýyq úleskerdiń múddesin qorǵap, satyp alý-satý sharttaryn jaramsyz dep taný týraly 9 talap-aryz qanaǵattandyrdy.

Qalyptasqan jaǵdaıdy retteý maqsatynda «Aqtóbe qurylys kompanııasy – 2023» JShS qurylyp, bıýdjet qarajaty esebinen úleskerlerdiń máselesin sheshý tetigi pysyqtalyp jatyr.

2025 jyly ınvestor-merdigerdi tartý arqyly bir problemalyq nysannyń qurylysy aıaqtalyp, 58 úleskerge páter kiltteri tabystaldy.

Bıylǵy jeltoqsanda taǵy shamamen 100 páterdi berý josparlanyp otyr.

Sonymen qatar, kináli tulǵalar Qazaqstan Respýblıkasynyń Ákimshilik quqyq buzýshylyq týraly kodeksiniń 320-baby 1-bóligi (turǵyn úı qurylysyna úlestik qatysý týraly zańnamany buzý) boıynsha ákimshilik jaýaptylyqqa tartylyp, aıyppul salyndy.

- Úleskerlerdiń quqyqtaryn qorǵaý prokýratýra organdary qyzmetiniń basym baǵyttarynyń biri bolyp qala beredi. Bul baǵyttaǵy jumys jalǵasýda, - delingen prokýratýranyń habarlamasynda.

Osyǵan deıin Astana prokýratýrasy «Qyran» turǵyn úı keshenine qatysty isti sotqa joldaǵany týraly jazdyq.