Aqtóbede úleskerlerdiń qarjysyn óz qajetine jumsaǵan kásipker sottaldy

AQTÓBE. KAZINFORM — Aqtóbede «Jılışe» turǵyn úı-kooperatıviniń basshysy Nurlan Kaýsov 6 jylǵa bas bostandyǵynan aıyryldy. Al 75 úleskerdiń azamattyq isi bólek qaralady.

№ 2 Aqtóbe qalalyq sotynda «Jılışe» turǵyn úı-kooperatıviniń basshysy Nurlan Kaýsovqa qatysty istiń úkimi shyqty. Sottalýshyǵa Qylmystyq kodekstiń «Alaıaqtyq» baby boıynsha aıyp taǵyldy. 

— Aqtóbe qalasynyń № 2 sotynyń úkimimen túpkilikti 6 jyl bas bostandyǵynan aıyrý jáne 3 jyl merzimge basshylyq laýazymdardy atqarý quqyǵynan aıyrý jazasy taǵaıyndaldy. 75 azamattyq talap qoıýshynyń materıaldyq zalaldy óndirý týraly aryzy azamattyq is júrgizý tártibimen qaralady. Sot úkimi zańdy kúshine engen joq, — dep habarlady Aqtóbe qalasynyń № 2 sotynyń baspasóz qyzmeti.

Eske salsaq, «Jılışe» turǵyn úı-qurylys kooperatıviniń basshysy Nurlan Kaýsovqa 421,9 mln teńgeni ıemdendi, qajetine jumsady degen aıyp taǵyldy. Kásipker 5 qabatty eki úıdiń tek jertólesin qazyp, irgetasyn qalaǵan.