Aqtóbede úleskerlerdi 421 mln teńge shyǵynǵa batyrǵan kompanııa basshysy kinásin moıyndady
AQTÓBE. KAZINFORM – Aqtóbede «Jılışe» turǵyn úı-kooperatıviniń basshysy Nurlan Kaýsov sot aldynda jaýap berip jatyr. Ol úleskerlerden aqsha jınap, úı qurylysyn ýaqytyly tapsyrmady.
№ 2 Aqtóbe qalalyq sotynda Qylmystyq kodekestiń «Alaıaqtyq» baby boıynsha is qaralyp jatyr.
«Jılışe» turǵyn úı-qurylys kooperatıviniń basshysy Nurlan Kaýsovqa 421,9 mln teńgeni ıemdendi, qajetine jumsady degen aıyp taǵyldy. Kásipker 5 qabatty eki úıdiń tek jertólesin qazyp, irgetasyn qalaǵan.
– Sottalýshy Nurlan Kaýs 2013 jyly oblystyq ádilet departamenti arqyly «Jılışe» turǵyn úı-qurylys kooperatıvin qurdy, tirkedi. 2018-2020 jyldar aralyǵynda sottalýshy Aqtóbe oblysynda jappaı kópqabatty úı salynyp jatqanyn kórip, tez paıda tabý maqsatynda alaıaqtyq joldy tańdaıdy, úleskerlerdiń aqshasyna úı salýdy josparlaıdy. Sóıtip 2018 jyly Aqtóbe qalalyq sáýlet jáne qala qurylysy bóliminen nysandy josparlaýǵa ruqsat alady. 2019 jyly 5 qabatty úıdiń qurylys-montaj jumystaryn bastap, 2020 jyly aıaqtaý oılaıdy. Sonymen birge 2019 jyly taǵy bir 5 qabatty úı salýǵa kelisim alady. Bul úıdi 2021 jyly bitirýi tıis bolǵan, - dedi sotta prokýror Qýanysh Kúzenbaev.
Sonymen qatar ol Qaýsovtyń úleskerlerden 421,9 mıllıon teńge aqsha jınap, onyń 184 mıllıonyn qaltasyna basqanyn aıtty.
– Qaýsov úıdiń 1 sharshy metriniń baǵasy áldeqaıda joǵary ekenin bile tura ár sharshy metrin 90-130 myń teńge dep kórsetedi. Turǵyn úı-qurylys kooperatıvi normasynyń talaptaryn buzyp, qurylys jumystaryn júrgizý úshin JShS-men kelisimshartqa qol qoıady. Ol JShS-niń de dırektory men quryltaıshysy ózi bolady. Úleskerlerdiń senimine kirý úshin qurylysty jartylaı júrgizip qoıady. Bir úıdiń jertólesin qazyp, irgetasyp quıý úshin 131 mln teńgeden astam qarjy, ekinshi nysanda da jertólesi qazylyp, irgetasyn qalaý, birinshi qabatyn kóterý úshin 105 mln teńgeden astam qarjy jumsalǵan. Sottalýshy Qaýsov úleskerlerden barlyǵy 421,9 mln jınaldy. Onyń 237 mln teńgesi qurylys-montajǵa jumsaldy. Qalǵan 184 mln teńgesin ózi ıemdenip alǵan, - dep tolyqtyrdy sózin Q. Kúzenbaev.
Tergeý kezinde kásipkerdiń ekinshi deńgeıli bank esepshotynan bar bolǵany 234 myń teńge tabyldy. Bul shyǵyndy óteýge jetpeıdi. Prokýror sottalýshyny aıypty dep tanyp, túpkilikti 6 jylǵa bas bostandyǵynan aıyrý jazasyn surady. Úleskerlerdiń aryzy azamattyq is retinde qaralýy múmkin.
Aıta keteıik, byltyr Aqtóbe oblysy boıynsha qurylysy aıaqtalmaı, kidirip qalǵan 31 nysan boldy. Onyń 8-i mektep edi.