Aqtóbede úleskerler qurylys kompanııasyna 2,5 mlrd berip, san soǵyp qaldy

ASTANA. KAZINFORM – Aqtóbede prokýrorlar úleskerlerdi 2,5 mlrd teńgege aldaǵan qurylys kompanııasynyń basshylaryna qatysty isti tergep, sotqa jiberdi. Bul týraly Aqtóbe oblysy prokýratýrasynyń baspasóz qyzmeti málim etti.  

Aqtóbe oblysynyń prokýratýrasy Qylmystyq kodekstiń 190-baby 4-bóligi 2-tarmaǵy jáne 279-babynyń 1-bóligi («Aldaý nemese senimin teris paıdalaný jolymen bótenniń múlkin jymqyrý, sondaı-aq qurylys qyzmeti salasyndaǵy erejelerdi nemese talaptardy buzý») boıynsha qylmystyq isti sotqa deıingi tergep-tekserýdi aıaqtady.

Tergeý oblys prokýrory Halıdýlla Dáýeshovtiń jeke baqylaýynda bolǵan. 

«2019-2023 jyldary Safina turǵyn úı kesheniniń basshysy K. jáne bir seriktestiktiń dırektory A., Aqtóbe qalasynyń 12-shi jáne «Altyn Orda» shaǵyn aýdandarynda salynyp jatqan kópqabatty úılerden páter beremiz degen jeleýmen úleskerlerdiń 2,5 mlrd teńgesin ıemdengen», — delingen habarlamada. 

Prokýratýranyń málimetinshe, bıyl 25 sáýirde Aqtóbe qalasynyń prokýratýrasy 2 kúdiktige qatysty qylmystyq isti Aqtóbe qalasynyń № 2 sotyna joldaǵan. 

Oblys prokýratýrasy qazaqstandyqtarǵa qyraǵy bolýǵa jáne alaıaqtardyń aılasyna túsip qalmaýǵa shaqyrady.