Aqtóbede ulan sarbazdary joǵalǵan búldirshindi taýyp, anasyna qaıtardy
AQTÓBE. QazAqparat - Aqtóbede ulan sarbazdary joǵalǵan balany taýyp, anasyna qaıtardy, dep habarlaıdy QazAqparat Ulttyq ulannyń baspasóz qyzmetine silteme jasap.
17 qańtar kúni keshki saǵat 17.30 shamasynda kishi serjant Z. Baltabaev bastaǵan, quramynda qatardaǵy N. Áýezov pen A. Úsentaı bar áskerı jasaq Aqtóbe qalasyndaǵy Abaı men Eset batyr kósheleriniń qılysynda qyzmetke kirisedi.
«Olar «Safarı» kafesiniń qasynan ótip bara jatyp 5-7 shamasyndaǵy balany baıqaıdy. Ózin Dıas dep tanystyrǵan balaqaı belgisiz jaqqa bara jatyr eken. Ony toqtatqan áskerı jasaq bastyǵy «ata-anań qaıda?» dep suraıdy. Kishkentaı bala óziniń adasyp ketkenin aıtady. Sol sátte polıtsııaǵa telefon soǵylyp, bala polıtsııa jasaǵyna tapsyryldy» delingen habarlamada.
Keıinnen aýlalardy tekserý kezinde joǵalǵan balanyń anasy da tabyldy. Ulandyqtar polıtsııa jasaǵyna habarlasyp, balany anasyna qaıtardy.
