Aqtóbede úgitilip jatqan jol máselesi: basqarma merdigerdi sotqa bergenimen jeńilip qaldy
AQTÓBE. KAZINFORM – Aqtóbe oblysy Muǵaljar aýdany Juryn men Qarakól aýyldarynyń arasyndaǵy jol qurylysy bıyl tolyq aıaqtalýy tıis. Muǵaljar aýdandyq TÚKSh, jolaýshylar kóligi jáne avtomobıl joldary bólimi merdigerdi sotqa bergenimen, jeńilip qaldy.
Aqtóbe oblystyq mamandandyrylǵan aýdanaralyq ekonomıkalyq sotta Juryn-Qarakól arasyndaǵy 30 shaqyrymdyq jol máselesi qaraldy. Іs materıalyna súıensek, 2022 jyly 4 shildede Muǵaljar aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi men «SAB-DorServıs» JShS Juryn-Qarakól-Aşysaı aýdandyq mańyzy bar avtomobıl joly 0-15, 15-30 shaqyrymyna ortasha jóndeý týraly shart jasalǵan. №58 sharttyń jalpy somasy - 743 117 396 teńge, №59 sharttyń jalpy somasy - 745 873 664,48 teńge. Oryndaý merzimi – 9 aı.
Taraptar №58 shart boıynsha 729 459 940,56 teńgege, №59 shart boıynsha 745 913 664,48 teńgege jumystyń oryndalǵany jóninde akt toltyryp, qol qoıylǵan. Keıin QR Sybaılas jemqorlyqqa qarsy is-qımyl agenttigi Aqtóbe oblysy boıynsha departamenti, oblystyq Іshki memlekettik aýdıt departamentiniń aýdıtory jáne maman T.N.Bıdanova Juryn-Qarakól-Aşysaı aýdandyq mańyzy bar avtomobıl jolynda 326 mln teńgeden astam somanyń jumysy atqarylmaǵanyn anyqtady. Sotta talap qoıýshy Muǵaljar aýdandyq TÚKSh, jolaýshylar kóligi jáne avtomobıl joldary bólimi 326 294 933 teńge somasyn óndirýdi, aqaýlardy qalpyna keltirýdi jáne jumysty aıaqtaýǵa mindetteýdi suraǵan. Sot «SAB-DorServıs» JShS-nen memleket paıdasyna 47 487 022 teńge, jergilikti bıýdjet paıdasyna 1 454 611 teńge memlekettik baj somasy óndirý týraly sheshim shyǵardy. Talap qoıýdyń qalǵan bóligi qanaǵattandyrýsyz qaldyryldy.
«Sotqa berdik, shara qoldaný jóninde hat jazdyq. Merdigerdi josyqsyz dep taný, jumysty aıaqtaý týraly talap qoıdyq. Biraq sotta utylyp qaldyq. Qazirgi ýaqytta merdiger úsh ýchaskeni qaıta qyryp qoıdy. Ol jerlerdi betondap, qaıta salady. Biraq asfalt tóseý jumysyn bastamady. Negizi jumystyń teń jartysyn Muǵaljar aýdandyq TÚKSh, jolaýshylar kóligi jáne avtomobıl joldary bólimi qabyldaǵan. Tek sáıkestendirý sertıfıkaty joq. Jol aktıvteriniń ulttyq sapa ortalyǵy synama alǵanda «saı emes» dep tanydy. Sonda da sol kezderi aqshalary tólengen, aýdarylǵan. Aqshanyń basym bóligin merdiger ıgerdi. Ol kezdegi basshy qazir joq, basqa aýdanǵa aýysyp ketti», - dedi Muǵaljar aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy Jandos Ýteýlın.
Eske salsaq, QR Premer-mınıstri Oljas Bektenov Aqtóbe oblysy Juryn men Qarakól aýyldarynyń arasyndaǵy jol sapasyn synap, turǵyndardyń shaǵymyna der kezinde nazar aýdarýdy tapsyrdy.
