Aqtóbede ýchaskelik polıtsııa qyzmetkerleri halyqqa jaqyn bolý úshin WhatsApp chat ashty
AQTÓBE. QazAqparat - Jergilikti polıtsııa qyzmeti 8 705 839 31 50 nómiri boıynsha WatsApp jelisinde chat ashty, dep habarlaıdy QazAqparat tilshisi.
Ýchaskelik polıtsııa qyzmetkerleri men turǵyndar arasyndaǵy baılanysty nyǵaıtý, tsıfrlyq baǵdarlamany iske asyrý, polıtsııa qyzmetiniń jumysyn jandandyrý maqsatynda arnaıy chat ashyldy. Endi óńirdiń kez kelgen turǵyny jeli arqyly aımaqta qalyptasqan qylmystyq jaǵdaıǵa qatysty óz oıyn ashyq aıta alady.
«Іshki ister mınıstrligi ýchaskelik polıtsııa ınspektorlarynyń jumysyn túbegeıli ózgertý maqsatynda birqatar bastamany qolǵa aldy. Polıtsııanyń jumysyn júıelendirý, retteý jáne jaqsartý maqsatynda Aqtóbe oblysy polıtsııa departamentiniń Jergilikti polıtsııa qyzmeti 8 705 839 31 50 nómiriniń WatsApp jelisinde chat qurdy. Osy nómir boıynsha turǵyndar qoǵamdyq tártip jáne qaýipsizdikti saqtaý boıynsha ýchaskelik polıtsııa ınspektorlarynyń jumysyn jaqsartýǵa qatysy usynystaryn joldaı alady», - dep habarlady oblystyq PD baspasóz jetekshisi Erbolat Sarqulov.
Jergilikti polıtsııa qyzmetiniń bastyǵy Qanat Álıevtiń aıtýynsha, bul azamattardyń polıtsııaǵa degen senimin odan ári nyǵaıtady.
