Aqtóbede ýchaskelik polıtseı bir otbasynyń páteraqysyn tólep berdi
AQTÓBE. QazAqparat - Aqtóbede polıtsııa qyzmetkeri Bahtııar Jaqypov karantın kezinde qarjylyq qıyndyqqa tap bolǵan otbasyǵa kómektesti, dep habarlaıdy QazAqparat tilshisi.Jas ana óz alǵysyn áleýmettik jeli arqyly bildirdi.
«Chekalın kóshesinde páter jaldap turamyn. Páteraqysyn tóleı almaı, 8 kúnge keshiktirdik. Ózimniń 2 jastaǵy jáne 4 aılyq balam bar. Joldasym karantın kezinde jumyssyz qalyp, 42500 teńgege ótinish berdi. Aqshanyń aýdarylýyn kúttik. Al páter ıesi «kúte almaımyn, shyq« dep adam jiberdi, ýchaskelik polıtsııa shaqyrdy. Polıtsııa qyzmetkeri Bahtııar Jaqypov jaǵdaıymdy túsinip, páteraqysyn óz qaltasynan tólep berdi. 40 myń teńge tóledi. Bes mınýt kórgen adam artyq sózsiz, aıqaı-shýsyz úlken kómek kórsetti. Alǵysymyz sheksiz», - dep jazdy qala turǵyny.
Baqtııar Jaqypov 10 jyldan beri quqyq qorǵaý salasynda eńbek etedi. Óz isin erlikke balamaıdy, suhbat berýge de qarsy.
«Baqtııar Jaqypov Ramazan aıynda qaıyrymdy is jasaýdy jón kórgen. Onyń bul isi zamandastaryna úlgi dep esepteımiz. Ári jan-jaqqa jarııalap, ashyq aıtýdy jón kórmedi», - dedi oblystyq PD baspasóz qyzmetiniń jetekshisi Erbolat Sarqulov.
