Aqtóbede ýaqytsha tergeý qapasy apatty jaǵdaıda tur
AQTÓBE. QazAqparat - Aqtóbe oblystyq ishki ister departamentiniń bastyǵy Mahambet Abısatov materıaldyq-tehnıkalyq bazany nyǵaıtý úshin bıýdjetten 7 mıllıard teńge aqsha surady, dep habarlaıdy QazAqparat tilshisi.
Aqtóbede 2018-2020 jyldarǵa arnalǵan oblystyq bıýdjet shyǵyny naqtylanyp jatyr. Máslıhatta bıýdjet, ekonomıka, ónerkásip jáne kásipkerlik jónindegi turaqty komıssııanyń keńeıtilgen otyrysy ótti. Aqtóbe oblystyq ekonomıka jáne bıýdjetti josparlaý basqarmasynyń basshysy Oljas Smaǵulov depýtattarǵa qarjynyń qaıda, qalaı jumsalatynyn baıandap berdi. Keler jyly oblystyq ishki ister departamentine 7,7 mıllıard teńge bólinetin boldy.
«Tutqynda otyrǵan adamdar qashyp ketpeýi úshin ýaqytsha tergeý qapasyna jóndeý júrgizý qajet. Nysan shırek ǵasyr buryn salynǵan, eskirgen. Ǵımarat ta adamdar sııaqty jyldar óte tozady, eskiredi. Kirpishteri sógilip jatyr», - dedi Aqtóbe oblystyq ІІD bastyǵy Mahambet Abısatov.
Belgili bolǵany, keler jyly polıtsııa qyzmetiniń materıaldyq-tehnıkalyq bazasyn nyǵaıtýǵa 7,7 mıllıard teńge bólinedi. Qarjynyń 4,5 mıllıard teńgesi qyzmetkerlerine jumsalyp, 3 mıllıard teńgege jóndeý jumystaryn júrgizýge baǵyttalady. Terrorlyq aktige qarsy tergeý ızolıatorynyń qaýipsizdigi kúshteıtilip, jańa qural-jabdyqtar satyp alynady. Al polıtsııa qyzmetkerlerine kólik satyp alýǵa 772 mıllıon teńge suralyp, 400 mıllıon teńge bólinetin boldy. Bul qarjyǵa 53 kólik satyp alynady. Aqtóbeniń bas polıtseıi kólikter bastyqtarǵa emes, qarapaıym qyzmetkerlerge beriletinin jetkizdi.
«Bizde 40 mashınany satyp alýǵa aqsha bólinip, 80 kólik qoldanystan shyǵarylǵan. Nátıjesinde polıtsııa qyzmetkerleri jaıaý júrýge májbúr boldy. Jaıaý júrgen polıtsııa qyzmetkeri jedel áreket jasaı almady. Árbir kómek suraǵan adamǵa ýaqtyly qyzmet kórsetý maqsaty tur. Oblys ortalyǵyndaǵy jóndeýge bolatyn kólikterdi qalpyna keltirip, aýdan, aýyldarǵa jiberemiz. Biz oblystyq bıýdjetten qajetti kóliktiń úshten birin surap otyrmyz», - dedi Aqtóbe oblystyq ІІD bastyǵy Mahambet Abısatov.
Al 100 mıllıon teńge baspanasy joq, kóshede qańǵyp qalǵan adamdardyń panalaıtyn ınternatyna beriledi. Qoǵamdyq tártipti baqylaýǵa kómektesken adamdarǵa syıaqy berý úshin 2 mıllıon teńge qarastyryldy.
Aıta keteıik, qazirgi kezde Aqtóbe oblystyq ІІD-de 287 kólik bar.
