Aqtóbede túzetý mekemesindegi 400-den astam jazasyn óteýshi jumyspen qamtylǵan
AQTÓBE. KAZINFORM – Metall, temir-beton buıymdaryn, jıhaz jasalyp, arnaıy kıim tigedi. №8 QAJ mekemesinde barlyǵy 14 shaǵyn jáne orta kásip bar.
Aqtóbe oblysynyń prokýrorasy, Kásipkerler palatasy, QAJ departamenti men jer qoınaýyn paıdalanýshylar, kásipkerler jınalyp, jumyspen qamtý jaıyn talqylady. Sebebi №8 QAJ mekemesinde myńǵa jýyq jazasyn óteýshi bolsa, onyń tek 400-den astamy jumys isteıdi.
– Negizgi suraq – shaǵyn jáne orta bıznes ıelerin qyzyqtyrý joly. Bıznes túzetý mekemesinen kásip ashýy úshin ınfraqurylymdy jańartý kerek. Bul da mol aqshaǵa tireletin jumys. Sonymen birge túzetý mekemesine kirgizý júıesi de kásipkerler jıi qoıatyn suraqtyń biri. Kezdesýge iri óndiris oryndarymen qatar quqyq qorǵan organdary shaqyryldy. Kásipkerlerdi qarjylandyrý suraǵy da mańyzdy, - dedi «Atameken» kásipkerler palatasy dırektorynyń orynbasary Vladımır Sýhorýchenko.
QAJ departamentiniń basshysy Rýslan Ýrazbaevtyń aıtýynsha, №8 mekemede 14 shaǵyn jáne orta bıznes sýbektisi jumys isteıdi. Onda shamamen 450 sottalýshy jumyspen qamtylǵan. Arnaıy kıim tigedi, makaron ónimderi shyǵarylady. Temir-beton buıymdaryn, jıhaz jasaıdy. Sonymen birge jóndeý-mehanıkalyq tseh bar.
– Oblysta qaýipsizdigi ortasha túzetý mekemesi bireý. Tek sol jerde taǵy da jumys oryndaryn ashý josparlanǵan. Sottalǵandardy áleýmettendirý maqsatynda 2019 jyldan bastap jumys atqarylyp keledi. Jol kartasy da qabyldandy, - dedi Aqtóbe oblysy prokýrorynyń birinshi orynbasary Talǵat Álibaev.
Jıynda kásipkerler tarapynan naqty usynystar da aıtyldy. «Shofer» JK basshysy Azamat Bazar óndiristi keńeıtýge, dóńgelekti qaıta óńdeýdi uıymdastyrýǵa, sondaı-aq sottalǵandardy temir ustasy isine oqytý qajet ekenin atap ótti. Bul bastama qatysýshylar tarapynan qoldaý tapty.
Aıta keteıik, Aqtóbede 200-den astam jazasyn óteýshi raqymshylyqqa iligedi. Raqymshylyqqa ilikken sottalǵandardyń bir bóligi bostandyqqa shyqsa, bir bóliginiń jazasy qysqarady.