Aqtóbede tuz tapshylyǵy bolmaıdy: 120 tonna tuz jetkizildi
ASTANA. KAZINFORM — Saýda jáne ıntegratsııa mınıstrligi Aqtóbede tuz baǵasy turaqty ekenin málimdedi.
Mınıstrliktiń málimetinshe, saýda jelileriniń sórelerinde negizinen otandyq óndirýshiler «Araltuz» jáne «Assol», sondaı-aq Reseıde óndirilgen «Iletskaıa» tuzdarynyń ónimderi satylyp jatyr.
Al «Anvar» jáne «Dına» saýda jelileri basshylyǵynyń málimetinshe, bıylǵy jyldyń 3 jeltoqsanynda olardyń qoımalaryna árqaısysy 120 tonnadan bir-bir vagon tuz jetkizilgen. Bul óńirdiń ortasha aılyq qajettiligin tolyq qamtamasyz etedi. Kelip túsken ónim bólshek saýda nysandary arasynda taratylyp jatyr.
— Budan bólek, jolda taǵy da eki vagon (120 tonna) tuz kelip jatyr, olar kelesi apta keledi. Qazirgi ýaqytta Reseıde óndirilgen tuzdy temirjol kóligimen tasymaldaýda týyndaǵan qıyndyqtarǵa baılanysty onyń jetkiziliminde kidirister bar, — delingen vedomstvo habarlamasynda.
Jalpy, qoldaǵy bar qor men josparlanǵan otandyq ónim jetkizilimi óńirdiń tuzǵa degen qajettiligin tolyq qamtamasyz etýge múmkindik beredi.
«Araltuz» tuzynyń kóterme baǵasy — 85 tg, bólshek saýdadaǵy baǵasy — 97 tg.
«Assol» tuzynyń kóterme baǵasy — 54 tg, bólshek baǵasy — 62 tg.
«Iletskaıa» tuzynyń kóterme baǵasy — 48 tg, bólshek baǵasy — 51 tg.
Sońǵy ýaqytta tuzdyń bólshek baǵasy ózgergen joq.
Anyqtama úshin Óńir halqynyń tuzǵa degen jyldyq qajettiligi — 1 390 tonna, ortasha aılyq qajettilik — 116 tonna.
Eske sala keteıik, buǵan deıin Aqtóbede as tuzy tapshylyǵy sezile bastaǵanyn jazǵan edik.