Aqtóbede túıequs sharýashylyǵy jumysyn toqtatty
AQTÓBE. QazAqparat - Aqtóbe oblysy Qobda aýdanynda túıequs ósirýdi qolǵa alǵan sharýa jumysyn toqtatty, dep habarlaıdy QazAqparat tilshisi.
Aqtóbe oblysy Qobda aýdanynyń kásipkeri Saılaý Mataev túıequs ósirý úshin «Aýyl sharýashylyǵyn qarjylaı qoldaý qory» Aqtóbe fılıaly arqyly 1,7 mıllıon teńge nesıe alyp, Reseıdiń Samara qalasynan túıequstyń balapanyn ákeldi. Buǵan deıin habarlaǵanymyzdaı, sharýa aldyn-ala túıequs ósirýdiń joldaryn úırenip, kórshi elge baryp kelgen . Biraq onyń jumysy alǵa baspady.
«Elimizde ózindik qunyn óteı almaıtyn sharýashylyqtarǵa sýbsıdııa beriledi. Túıequs sharýashylyǵy biregeı baǵyt, eti men jumyrtqasy jeńsik as bolǵan soń, shyǵyny ózin-ózi óteıdi dep esepteledi. Bul baǵyttaǵy sharýashylyqqa sýbsıdııa qarastyrylmaǵan. Túıequsty ákelip, baǵyp, ósirip, birden paıdaǵa kenelemin dep josparlaýǵa da bolmaıdy. Shetelden ákelingen kez kelgen mal aýa raıyna, jerge 1-2 jyl úırenedi. AQSh, Eýropadan ákelingen iri qara mal da 1-2 jyl beıimdeledi, sharýalar shyǵyndalady. Al túıequs sharýashylyǵyn qolǵa alǵan kásipker bul jumysty ári qaraı jalǵastyra alady. Kez kelgen kásipker aldymen taýardyń satylýyn, suranysyn naqtylap alýy tıis», - dedi Aqtóbe oblysy aýyl sharýashylyǵy basqarmasynyń basshysy Qusaıyn Sarsembaı.
