Aqtóbede tutynýshylardyń quqyqtaryn qorǵaý basqarmasynyń qos mamany paramen ustaldy
AQTÓBE. QazAqparat - Aqtóbe qalalyq tutynýshylardyń quqyqtaryn qorǵaý basqarmasynyń eki mamany paramen ustaldy, dep habarlaıdy QazAqparat tilshisi.
Aqtóbe qalalyq tutynýshylardyń quqyqtaryn qorǵaý basqarmasyndaǵy epıdemıologııa bóliminiń bas mamany men jetekshi mamany para alý kezinde ustaldy. Bul derekti oblystyq tutynýshylardyń quqyqtaryn qorǵaý departamentiniń basshysy Nursulý Berkimbaeva rastady.
«Eki maman da jumysta joq. Tergeý júrip jatyr. Biraq biz oqıǵanyń qalaı bolǵanyn aıta almaımyz. Qolymyzda eshqandaı da qujat joq»,- dedi Nursulý Berkimbaeva.
Aıta keteıik, ótken jyly kásipkerler arasynda saýalnama júrgizilip, Aqtóbe oblysy boıynsha sanıtar-epıdemıolog mamandar para alýshylar tiziminiń kóshin bastaǵan bolatyn. Sol kezde oblystyq tutynýshylardyń quqyqtaryn qorǵaý departamentiniń basshysy Nursulý Berkimbaeva sońǵy úsh jylda paraqorlyqqa baılanysty istiń tirkelmegenin málimdedi. Tipti, para alý deregine qatysty aıyptaýdan soń tekserý júrgizilip, bilim jáne medıtsına salasyna salynǵan aıyppuldar qyzmetkerlerden jınalatynyn anyqtaǵan eken.
