Aqtóbede tutynýshylar shaǵymynan soń 100 mln teńge keri qaıtaryldy

AQTÓBE. KAZINFORM — Byltyr 2 myńǵa jýyq tutynýshy óz quqyǵyn qorǵaý úshin aryz-shaǵym túsirdi. Kóbi taýardy keri qaıtarý, almastyrý kezinde kedergige kezikti.

Aqtóbede tutynýshylar óz quqyǵyn qorǵaý úshin arnaıy organdarǵa jıi júgine bastady. 2024 jyly 1400-ge jýyq adam shaǵym túsirse, 2025 jyly 2 myńǵa jýyqtap, ósim 38% qurady. Nátıjesinde tutynýshylar 100 mln teńgeni keri qaıtaryp aldy.

— Shaǵymnyń basym bóligi bólshek saýda salasyna tıesili. Kóbine taýardy qaıtarý, almastyrýdan bas tartyp jatady. Sonymen birge sapasy syn kótermeı, shaǵym túsiredi. Elektrondy saýda salasyna qatysty 363 ótinish tústi. Munda taýar sıpattamaǵa saı kelmeıdi, satýshy týraly aqparat joq jáne aqshany keri qaıtarmaı, ábigerge salady. Óńirde jıhaz daıyndaý jáne ony jóndeý, qurylys, sulýlyq salondary men turmystyq qyzmet kórsetý sapasyna qatysty 400-ge jýyq suraq tústi, — dep habarlady oblystyq saýda jáne tutynýshylardyń quqyqtaryn qorǵaý departamenti.

Byltyr sapaly qyzmet kórsete almaǵan kásipkerler de ákimshilik jaýapqa tartyldy. Olarǵa 2,2 mln teńge aıyppul salyndy. Sonymen birge sot arqyly 40 mln teńge óndirildi.

— Tutynýshylar onlaın saýda jasaıdy, Instagram jelisi arqyly tapsyrys beredi. Dál osy tusta olardyń quqyǵy jıi buzylady. Kóp jaǵdaıda tutynýshylar taýarǵa tapsyrys bergende satýshynyń mekenjaıy men baılanys telefonyn bilmeıdi. Saldarynan taýar sapasy syn kótermeıdi nemese ony qaıtarý qıynǵa soǵady, — dep habarlady oblystyq saýda jáne tutynýshylardyń quqyqtaryn qorǵaý departamenti.

Aıta keteıik, 2025 jyly tutynýshylardan túsken ótinishter sany 134 paıyzǵa artqan. Qabyldanǵan sharalardyń nátıjesinde tutynýshylarǵa 2,804 mlrd teńge qaıtaryldy, bul ótken jylmen salystyrǵanda 135,6 paıyzdyq ósimdi kórsetedi.