Aqtóbede túrli dıaspora ókilderi qan tapsyrdy

AQTÓBE. KAZINFORM – Aqtóbedegi túrli dıaspora ókilderi men turǵyndar qan tapsyryp jatyr. Búgin túske deıin 30 adam Aqtaýda bolǵan ushap apatynan aman qalǵandarǵa osylaı qoldaý kórsetti.

Aqtóbe oblysyndaǵy qan ortalyǵynda búgin adam sany kóbeıdi. Donorlar arasynda stýdentter, qarapaıym qala turǵyndary men túrli dıaspora ókilderi bar. 

- Ázirbaıjan áýe kemesiniń apatqa ushyraýy bizge de aýyr tıdi. Ázirbaıjan assotsıatsııasynyń Aqtóbedegi ókilderi qaıǵyra kóńil aıtady. Búgin qaýymdastyq ókilderi, aqsaqaldar men jastar qoldaý kórsetýge keldi. Biz de qan tapsyryp jatyrmyz. Aman qalǵan adamdardyń tezirek saýyǵyp ketýin tileımiz. Qazir biz Qazaqstanda tatý-tátti ómir súrip jatyrmyz. Óńirde 17 etno-mádenı birlestik bolsa, bári de keshe kóńil aıtty, qoldaý bildirdi. Olar da kelip, qan tapsyryp jatyr. Syǵan, grek, tatarlar baýyrlarymyzdyń qan tapsyrýǵa kelgeni kóńilge medeý,- dedi Ázirbaıjan dıasporasy tóraǵasynyń orynbasary Vıdadı Farzalıev.

Qazirgi kezde Aqtóbe oblysynda qan qory jetkilikti. 

- Mańǵystaý oblysynda bolǵan tótenshe jaǵdaıǵa baılanysty qan qoryn toltyrý maqsatynda adamdar kelip, qan tapsyryp jatyr. Qazirgi tańda 30-ǵa jýyq adam qan tapsyrdy. Keshe Mańǵystaý oblysyna kómek retinde 20 flakon albýmın jiberildi. Qazirgi kezde aktsııa áli jalǵasyp jatyr. Negizi qan ortalyǵynda qan qory jetkilikti,- dedi Donorlardy jınaqtaý bóliminiń meńgerýshisi Tolybek Kýlybaev.

Aıta keteıik, Aqtóbe oblysynan Aqtaýǵa dári-dármek jiberildi. Búgin júk sol jaqta bolady.