Aqtóbede túrli deńgeıdegi máslıhattarǵa kandıdat usyný merzimi aıaqtaldy

AQTÓBE. KAZINFORM — Qazir máslıhat depýtattyǵyna úmitkerlerdi tirkeý jalǵasyp jatyr. Barlyǵy 37 kandıdattyń 23-i ózin-ózi usynǵan.

Aqtóbe oblysynda shyǵyp qalǵan depýtattardyń ornyna kandıdattardy usyný aıaqtalyp, qazir tirkeý júrip jatyr. Barlyǵy 37 kandıdat usynyldy. Onyń 14-in saıası partııalar tizimge engizse, 23-i ózin-ózi usyndy. Usynylǵan kandıdattar 29-y er adam jáne 8-i áıel. Ortasha jasy — 38 jas. 

— 28 kandıdattyń joǵary bilimi, al 9 kandıdattyń orta kásiptik bilimi bar. Kandıdattardyń 18-i memlekettik mekemelerde, uıymdarda, 14-i kommertsııalyq qurylymdarda jumys isteıdi. Bireýi saıası partııa qyzmetkeri, bireýi jumyssyz, bireýi zeınetker, ekeýi jumyspen qamtýdyń ózge toptarynyń ókilderi. 6 kandıdat tirkeý merzimi aıaqtalǵanǵa deıin óz ótinishimen kandıdatýrasyn alyp tastady, — dep habarlady Aqtóbe oblystyq saılaý komıssııasy.

Aıta keteıik, Aqtóbede túrli deńgeıdegi máslıhattardyń 10 depýtaty saılanady. Aqtóbe qalalyq máslıhatynyń eki depýtaty jáne 6 aýdanda 8 depýtattyń orny bar.