Aqtóbede túrli deńgeıdegi máslıhattardyń saılaýy ótip jatyr
AQTÓBE. KAZINFORM — Aqtóbe qalalyq máslıhatyna eki depýtat jáne 6 aýdanda 8 depýtat saılanady.
Aqtóbe qalasyndaǵy saılaý ýchaskesinde múgedektigi bar saılaýshylardyń tańdaý jasaýy úshin jańa qurylǵy ornatyldy. Kózi nashar kóretinder men kózi múlde kórmeıtin adamdarǵa jaryq maıaktary bar qurylǵy arqyly kómek beriledi. Batyrmany basyp, habarlama arqyly ár qadamdy biledi.
— Komıssııa múshesi saılaýshyǵa ym tilinde beıne aýdarmasy bar planshet te usynady. Kózi nashar kóretin adam beıneni úlkeıtetin lýpany paıdalanady, — dedi № 21 saılaý ýchaskesiniń tóraǵasy Ásemgúl Nýkýsova.
№ 21 saılaý ýchaskeside 17 adam úıinde otyryp tańdaý jasaıdy. Olarǵa arnaıy jyljymaly jáshik aparady.
— Aqtóbe oblysynda 10 saılaý okrýgi jumys istep tur. Aqtóbe qalasy jáne Hromtaý, Shalqar aýdandaryndaǵy eki saılaý okrýginde, Baıǵanın, Yrǵyz, Qarǵaly, Oıyl aýdandarynda bir-bir saılaý okrýginde saılaý ótip jatyr. Saılaýdy daıyndaý men ótkizýge 48 saılaý komıssııasy jumyldyryldy. Sonyń ishinde 7 aýmaqtyq, 10 okrýgtik jáne 31 ýchaskelik komıssııa, — dedi Aqtóbe oblystyq aýmaqtyq saılaý komıssııasynyń múshesi Radına Kókkózova.
Eske salsaq, QR «Saılaý týraly» Zańyna sáıkes jyl saıyn naýryz jáne qazan aılarynyń sońǵy jeksenbisinde shyǵyp qalǵan depýtattardyń orny toltyrylady.