Aqtóbede týrıstik joldamamen aldaǵan kúdiktige qatysty is qozǵaldy
ASTANA. KAZINFORM – Aqtóbede týrıstik qyzmet kórsetý jeleýimen jasalǵan alaıaqtyq faktisi boıynsha sotqa deıingi tergep-tekserý bastaldy.
Aqtóbe qalasy prokýratýrasynyń málimetinshe, kúdikti áleýmettik jelilerde shetelge týrıstik saparlar uıymdastyrý týraly habarlandyrýlar jarııalap, azamattarǵa týrlardy, áýe bıletterin jáne qonaqúıdi brondaıtynyn aıtyp aqsha alǵan.
Alaıda tólemdi alǵannan keıin óz mindettemelerin oryndamaı, týrıstik saparlardy uıymdastyrmaǵan. Tergeý málimetine sáıkes, jábirlenýshilerdiń aqshasy kúdiktiniń jeke maqsattaryna jumsalǵan.
«Zańǵa qaıshy áreketterdiń saldarynan jábirlenýshilerge eleýli materıaldyq zalal keltirilgen. Atalǵan fakti boıynsha Qylmystyq kodekstiń 190-babynyń 3-bóligimen (alaıaqtyq) sotqa deıingi tergep-tekserý júrgizilýde», – dep habarlady prokýratýra.
Qadaǵalaý organy azamattardy ınternet jáne áleýmettik jeliler arqyly týrıstik qyzmetterdi satyp alý kezinde saq bolýǵa shaqyrdy.
Prokýratýranyń málimetinshe, aqsha aýdarmas buryn týroperatordyń nemese týrıstik agenttiktiń memlekettik tirkeýden ótkenine kóz jetkizip, pikirlermen tanysyp, shart talaptaryn muqııat zerdelep, tólem jasalǵanyn rastaıtyn qujattar men hat almasýdy saqtap qoıǵan jón.
Eger osyndaı alaıaqtyqtyń qurbany bolsańyz nemese soǵan uqsas faktiler týraly aqparatyńyz bolsa, quqyq qorǵaý organdaryna dereý habarlasý qajet.
Aıta keteıik, Almaty oblysynda ınternet-alaıaqtyqqa qatysty 518 jalǵan habarlandyrý buǵattaldy.
