Aqtóbede týrıstik agenttikterge shaǵymdanýshylar kóbeıdi
AQTÓBE. KAZINFORM – Týrıstik qyzmet salasynda tutynýshylardyń quqyǵy jıi buzyla bastalady. Byltyrǵyǵa qaraǵanda bıyl shaǵym túsirgender sany 30% artqan.
Aqtóbe oblystyq saýda jáne tutynýshylardyń quqyqtaryn qorǵaý departamentine bıyl 700-den astam adamnan ótinish tústi. Byltyrǵyǵa qaraǵanda shaǵym túsirgender qatary 44% kóbeıdi. Áli de taýardy onlaın satyp alǵandar jıi kómek suraıdy. Sonymen birge bólshek saýdada kelise almaǵandar sany 220-ǵa jetken.
- Oblysta 138 tutynýshynyń shaǵymy der kezinde retteldi, al 192 tutynýshyǵa quqyqtyq kómek kórsetildi. Sonymen birge departament 85 ákimshilik shara qabyldady. Nátıjesinde 85 iri, orta, shaǵyn bıznes sýbektisine 2 mıllıon teńgeden astam aıyppul salyndy. Týrıstik saparlardy uıymdastyrý boıynsha mindettemelerdi oryndamaý faktisi boıynsha 5 jáne odan da kóp tutynýshydan júıeli túrde ótinish tústi. Tutynýshylarǵa sotqa talap qoıý tártibi túsindirildi, sondaı-aq bir fakti boıynsha Ákimshilik quqyqbuzýshylyq týraly kodekstiń 190-baby 6-bóligine sáıkes hattama toltyryldy. ıAǵnı týrıstik agenttik adamdardyń aqshasyn alyp, qyzmet kórsetpegen. Bul jaǵdaı byltyr da tirkeldi. Agenttikter týrıstik baǵytqa bılet almaǵan, keıde ony álemdegi saıası jaǵdaılarmen baılanystyrǵan. Al aqshany 14 kúnde qaıtaratynyn aıtqan. Negizi qyzmet kórsetpese, kelisimshart buzylsa tutynýshy sol kúni-aq aqshasyn qaıtaryp alýǵa quqyly. Jalpy byltyrǵa qaraǵanda bıyl týrıstik qyzmetke qatysty shaǵym 30% artty,- dedi Aqtóbe oblystyq saýda jáne tutynýshylardyń quqyqtaryn qorǵaý departamentiniń bas mamany Aqbota Jumamurat.
Aıta keteıik, Almaty oblysynyń Saýda jáne tutynýshylardyń quqyqtaryn qorǵaý departamenti 2026 jyldyń alǵashqy toqsanyn nátıjeli qorytyndylady. Bıyl tutynýshylarǵa 13 mln teńge qaıtaryldy.
