Aqtóbede týrısterge arnalǵan ortalyq ashyldy

AQTÓBE. QazAqparat – Aqtóbe áýejaıynda týrısterge arnalǵan ortalyq ashyldy. Munda syrttan kelgenderge óńirdiń tarıhı-mádenı oryndary tanystyrylyp, týrmarshrýttar usynylady, dep habarlaıdy QazAqparat tilshisi.

Á.Moldaǵulova atyndaǵy halyqaralyq áýejaıda​ «Visit Aktobe» ortalyǵy ashyldy. Jobanyń basty maqsaty —​ ishki týrızmdi damytý.

«Ortalyqta óńirdiń týrıstik nysandaryna​ qatysty keńes berý qyzmetteri kórsetiledi. Sonymen qatar jergilikti óndirýshiler men​ ​ qolóner sheberleriniń brend ónimderi turatyn burysh​ ornalasqan»,- deıdi Aqtóbe oblystyq kásipkerlik basqarmasynyń basshysy Nurhan Tileýmuratov.

Jalpy óńirde 18 týrıstik marshrýt bar. Týrıster úshin 100-ge jýyq qonaqúı qyzmet kórsete alady. Nurhan Tileýmuratovtyń aıtýynsha, 80-nen asa mádenı eskertkishi bar óńirge suranys joǵary bolýy múmkin.

«Bıyl óńirge 100 myńǵa jýyq adam kelgen. Ótken jylda pandemııa kedergi keltirse, qazir qaıta jandaný baıqalady. Jyl saıyn qonaqúı ashylyp jatyr. Bul suranystyń áli de joǵary ekenin bildiredi. Aqtóbe oblysy úshin eń úzdik oryn Aqtolaǵaı borly taýy bolady dep oılap otyrmyz. Bul jerge suranys joǵary», - dedi Aqtóbe oblystyq kásipkerlik basqarmasynyń basshysy Nurhan Tileýmuratov.

Sonymen birge tabıǵat aıasynda túrli týrıstik sapar uıymdastyrý josparǵa engizilgen.

«Dımash Qudaıbergen qatysatyn​​ «Baqytty bala»​ halyqaralyq​ festıvali, sondaı-aq halyqaralyq kóshpendiler festıvali týrısterdi qyzyqtyrady. Bizdiń óńirge keletin qonaqtarǵa osyndaı sharalar týraly habardy aldyn ala berý kerek»,- dep atap ótti oblys ákimi Ońdasyn Orazalın​.