Aqtóbede túrik ınvestorlary salǵan jedel járdem stantsııasy paıdalanýǵa berildi
AQTÓBE. QazAqparat - Aqtóbe qalasynda túrik ınvestorlarynyń kómegimen jedel járdem beketi ashyldy. Memlekettik-jekeshelik áriptestik aıasynda salynǵan stantsııa qurylysyna 5,4 mıllıard teńge qarjy jumsaldy, dep habarlaıdy QazAqparat tilshisi.
Aqtóbe qalasyndaǵy jedel járdem stantsııasyn salýdy túrik ınvestorlary óz mindetine aldy. Memlekettik-jekeshelik áriptestik aıasynda alǵash ret qolǵa alynǵan jobanyń ashylýyna oblys ákimi Berdibek Saparbaev pen túrik ınvestorlary qatysty.
«Árbir adam úshin densaýlyq mańyzdy. Memleket basshysy Nursultan Nazarbaev qazaqstandyqtardyń densaýlyǵyna úlken mán berip keledi. Aqtóbede zaman talabyna saı medıtsınalyq jedel járdem stantsııasynyń ashylýy soǵan dálel. Turǵyndar medıtsınalyq kómektiń jedel jetkenin qalaıdy. Soǵan oraı túrik ınvestorlary Qazaqstanda birinshi ret memlekettik-jekeshelik áriptestik aıasynda stantsııa saldy. Túrik ınvestorlary 5,4 mıllıard teńge bóldi. Oblysta 32 reanımobıl berildi. Endi stantsııa tek Aqtóbe qalasyna ǵana emes, oblysqa jumys isteýi kerek. Eń negizgisi - elimizdiń jaǵdaıy, turmysy. Halyqtyń densaýlyǵy jaqsaryp, halyq sany kóbeısin»,- dedi oblys ákimi Berdibek Saparbaev.
Aıta keteıik, 2016 jyly Aqtóbe oblysynyń ákimdigi men túrik ınvestorlary ózara kelisimge keldi. Nátıjesinde «Alǵashqy kómek» JShS-i jedel járdem stantsııasyn senimgerlik basqarýǵa aldy. Alqashqy kezde 16 zamanaýı «Mersedes bents» reanımobıli jetkizildi. Sonymen qatar, 16 sanıtarlyq avtokólik jáne 2 dıagnostıkalyq kólik ákelindi. Qazir 10 operatory bekitilgen CALL-ortalyǵy jumys istep tur. 
