Aqtóbede turǵynnyń saýalyna jaýap bermegen memlekettik qyzmetshi jazalandy

AQTÓBE. QazAqparat - Tuńǵysh Prezıdent atyndaǵy saıabaqty kútip ustaýǵa bólinetin qarjynyń kólemi týraly aqtóbelik turǵynnyń saýalyna nemquraıly qaraǵan memlekettik qyzmetshi jaýapkershilikke tartyldy, dep habarlaıdy QazAqparat tilshisi.

Memlekettik qyzmet isteri agenttiginiń Aqtóbe oblystyq departamenti sársenbi kúni qalalyq ákimdikte jıyn ótkizdi. Ádep keńesi qalalyq turǵyn úı-kommýnaldyq sharýashylyq bólimi basshysynyń mindetin atqarýshy Jandos Óteýlınniń máselesin qarady. Ol turǵynnyń saýalyna jaýap berýdi bos ýaqyt ótkizý dep bilgen.

«Azamat T. Esdáýletov osy jyldyń 4 jáne 15 shildesi kúnderi Tuńǵysh Prezıdent atyndaǵy saıabaqty kútip ustaýǵa jumsalatyn qarjy men saıabaqtan bıýdjetke túsetin aqsha týraly aqparat suraǵan. Ol 2013-2019 jyldary aralyǵyndaǵy málimetti bilmek bolǵan. Biraq bólim basshylyǵy naqty aqparat berýden bas tartqan», - dedi Memlekettik qyzmet isteri agenttigi oblystyq departamentiniń bas mamany Q.Aqıev.

Qalalyq turǵyn úı-kommýnaldyq sharýashylyq bólimi basshysynyń mindetin atqarýshy Jandos Óteýlın óz kinásin moıyndady.
«Aqtóbelik turǵyn óz suraǵyna jaýapty aldy. Biraq alǵashqysynda jaýap berilmedi, kinámdi moıyndaımyn. Suraǵan ár adamnyń bárine jaýap berýge mindetti emespiz dep oıladym», - dedi J.Óteýlın.
Ádep keńesi oǵan qyzmetine saı emestigi týraly eskertý berdi.